शान्ति नमुना र पर्ल क्वाटर फाइनलमा

तिलोत्तमा, असोज ४ । रुपन्देहीको तिलोत्तमा–५ मणिग्राममा रहेको शान्ति नमुना माध्यमिक विद्यालयको स्पोट्स क्लवको आयोजनामा जारी जिल्ला स्तरीय फुटवल प्रतियोगिता अन्तरगत मंगलबारको खेलमा शान्ति नमुना मा. वि. र पर्ल सेकेन्डरी स्कूल विजयी भएका छन् ।
रुपन्देही जिल्लाका विभिन्न विद्यालयमा कार्यरत शिक्षक कर्मचारी बीच आयोजित प्रतियोगितामा आज भएको पहिलो खेलमा पर्ल सेकेन्डरी स्कुलले ज्ञानगंगा पाठशालालाई हराएको छ । ज्ञानगंगालाई २–१ को गोल अन्तरले हराउदै पर्ल क्वाटर फाइनलमा प्रवेश गरेको हो । पर्लको लागि दुवै गोल कुनाल गुरुङ्ले गरेका हुन भने ज्ञानगंगाको लागि एक मात्र गोल बिशाल रानाले गरेका हुन् ।
त्यस्तै दोस्रो खेलमा शान्ति नमुना मा.वि.ले मदरल्यान्ड एकेडेमीलाई ट्राइब्रेकरमा २–१ अन्तरले हराएको छ । शान्तिको जितको लागि गोलकिपर प्रकाश घिमिरेले उत्कृष्ट बचाउ गरेका थिए । जीतसँगै शान्तिले क्वाटर फाइनलको यात्रा तय गरेको शान्ति स्पोर्टस क्लवका सचिव नारायण ज्ञवालीले जानकारी दिनुभयो ।
प्रतियोगिता अन्तरगत बुधबार पहिलो खेल शिवपुर माध्यमिक विद्यालय र लुम्बिनी सिटी कलेजबीच हुनेछ । दोस्रो खेलमा स्कलर्स होम बिरुद्ध जनता माध्यमिक विद्यालय खेल्ने शान्ति स्पोर्टस क्लवका अध्यक्ष राजेन्द्र के.सी. ले बताउनुभयो ।
रुपन्देही जिल्लामा रहेका सामुदायिक तथा संस्थागत विद्यालयमा कार्यरत शिक्षक तथा कर्मचारीबीच आत्मीयता र सदभाव बढाउने उद्धेश्यका साथ खेल आयोजना गरिएको शान्ति नमुनाका प्रधानाध्यापक कुलप्रसाद लामिछानेले बताउनुभयो ।
प्रतियोगिताका विजेताहरुलाई खसी सहित ट्रफी, प्रमाणपत्र तथा मेडल प्रदान गरिने छ ।