शान्ति नमुनाको हाजिरी जवाफको उपाधि रामापुर मा.वि.लाई

तिलोत्तमा , माघ ९ । रुपन्देहीको तिलोत्तमा वडा नं–५ मणिग्राममा रहेको शान्ति नमुना माध्यमिक विद्यालयले सोमबार जिल्ला स्तरीय हाजिरीजवाफ प्रतियोगिता गरेको छ ।
रुपन्देही जिल्लाका ४० वटा विद्यालय सहभागी भएकोमा रामापुर माध्यमिक विद्यालय प्रथम भएको छ । रामापुरले नगद रु.१० हजार , ट्रफी र प्रमाणपत्र प्राप्त गरेको छ । यस्तै द्वितीय भई बुद्ध पब्लिक बोर्डिङ स्कुलले नगद रु.७ हजार, तृतीय भई ग्रिन प्लान्ट बोर्डिङ स्कुलले नगद रु ५ हजार र प्रोत्साहन स्थान प्राप्त प्यारामाउण्टले नगद रु. ३ हजार, प्रमाणपत्र र मेडल प्राप्त गरेको प्रतियोगिताका संयोजक मोहन पौडेलले जानकारी दिनुभयो ।
यसअघि उद्घाटन कार्यक्रममा तिलोत्तमा नगरपालिकाका प्रमुख रामकृष्ण खाँणले विद्यार्थीबिच मित्रताको भावना जगाउँदै उनीहरुमा सृजनशिलता थप्न यस प्रकारका कार्यक्रम प्रभावकारी हुने बताउनुभयो । नगर प्रमुख खाँडले सामुदायिक र संस्थागत विद्यालय एकै सिक्काका दुई पाटा भएको बताउँदै दुबैको सहकार्य जरुरी रहेको औल्याउनुभयो ।
कार्यक्रममा विद्यालय व्यवस्थापन समितिका अध्यक्ष शरद भट्टराईले बालबालिकालाई पढ्ने वातावरण सहज रूपमा बनाउनुपर्नेमा जोड दिनुभयो । यस्तै पूर्व जिल्ला शिक्षा अधिकारी टेक बहादुर थापाले हरेक कुरामा विद्यार्थीहरूलाई अग्रसर गराउनु विद्यालय र अविभावकको दायित्व भएकोमा जोड दिनुभयो ।
विद्यालयका प्राचार्य कुल प्रसाद लामिछानेले जिल्लाभरका विद्यालयहरुबीच सद्भाव, सहकार्य र आत्मीयता अभिवृद्धि गर्ने उद्धेश्यले कार्यक्रम गरिएको भन्दै आगामी दिनमा अझ रचनात्मक कार्यक्रम मार्फत सामुदायिक विद्यालयको गरिमा माथि उठाउने प्रतिवद्धता जनाउनुभयो । कार्यक्रमको सञ्चालन शिक्षक रजनी के.सी. र सुबोध खनालले गर्नुभएको थियो ।
यसैबीच ६४ औं वार्षिकोत्सवका अवसरमा सोमबार विद्यालयमा रक्तदान कार्यक्रम गरिएको छ । कार्यक्रममा ३० युनिट रगत संकलन भएको कार्यक्रम संयोजक विष्णुप्रसाद अर्यालले जानकारी दिनुभयो । युवा रेडक्रस सर्कल शान्ति नमुना माविको अयोजनामा भएको सो कार्यक्रममा रक्त सञ्चार केन्द्र बुटवलको प्राविधिक सहयोग रहेको थियो ।
त्यस्तै सोमबार फुड फेस्टिबल समेत आयोजना गरिएको थियो । कक्षा आठ , नौ , एघार , बाह्र र डिप्लोमा इन होटल म्यानेजमेन्टका विद्यार्थीहरूको सहभागीमा फुड फेस्टिबलको आयोजना गरिएको हो । विद्यार्थीहरूले आवश्यक सामग्रीहरूको व्यवस्थापन आफै गरेर खानाका विभिन्न परिकार बनाएको कार्यक्रम संयोजक सुशिला पाण्डेले जानकारी दिनुभयो । फुड फेस्टिबलमा विद्यार्थीहरूले पास्ता , मम , फुल्की , चटपट , सेलरोटी , अचार , ढिकरी , मन्चुरियन , पकौडा लगायतका परिकार बनाएका थिए ।
वार्षिकोत्सवको मुल कार्यक्रम माघ १२ गते हुनेछ । वार्षिकोत्सवका अवसरमा पुरस्कार वितरण एवम् सम्मानका कार्यक्रम, नानी पत्रिकाको बिमोचन, सांस्कृतिक कार्यक्रम गरिने विद्यालयका सूचना संयोजक दिनेश खड्काले जानकारी दिनुभयो ।