बुटवल- कार्तिक । सहकारी ठगी र संगठित अपराध मुद्दाको अनुसन्धानका लागि कास्की प्रहरी हिरासतमा रहेका रास्वपाका सभापति तथा पूर्वगृहमन्त्री रवि लामिछानेलाई मंगलबार रूपन्देही ल्याईने भएको छ ।पोखराको सूर्यदर्शन सहकारीको रकम अपचलन मुद्दामा कास्की कास्की प्रहरीको हिरासतमा रहेका कुमार रम्तेल र शिवबहादुर गुरुङलाई सुप्रिमको रकम अपचलन सम्बन्धि मुद्दामा रूपन्देही प्रहरीले भैरहवा ल्याएर शुक्रबारदेखि सरकारी वकिलसमक्ष बयान भइरहेको छ ।बुटवलको सुप्रिम बचत तथा ऋण सहकारी संस्थाको रकम गोर्खा मिडिया नेटवर्कमा लगेर अपचलन गरेको कसुरमा अनुसन्धानका लागि बयान लिन रविलाई भैरहवा ल्याउन लागिएको हो । उनी कात्तिक २ गतेदेखि कास्की प्रहरी हिरासतमा छन् । यस अघि गोर्खा मिडिया नेटवर्कका उपाध्यक्ष एवं पूर्व डिआईजी छविलाल बञ्जाडे जाेशीसँग जिल्ला सरकारी वकिलको कार्यालय भैरहवामामा बयान भइसकेको छ ।
रूपन्देही प्रहरी प्रमुख प्रहरी उपरीक्षक रञ्जितसिंह राठौरले मंगलबार बिहान भैरहवा ल्याएलगत्तै बयान सुरु हुने बताए ।पोखराको सूर्यदर्शन सहकारीको रकम अपचलन सम्बन्धि मुद्दाको अनुसन्धानका क्रममा हाल कास्की प्रहरीकाे हिरासतमा रहेका लामिछानेलाई कास्की जिल्ला अदालतले आइतबार थप १३ दिन हिरासतमै राखेर अनुसन्धान गर्न अनुमति दिएको छ । त्यही समयभित्र रूपन्देहीमा पनि बयान गराएर पुनः कास्की नै पठाउने गरी तयारी गरिएको प्रहरीले जनाएको छ । तीन/चार दिनमै बयान सकेर कास्की नै पठाईने एसपी राठौरले बताए ।बुटवलस्थित सुप्रिम बचत तथा ऋण सहकारी संस्थाको १४ करोड २९ लाख ३६ हजार रुपैयाँ गोर्खा मिडिया नेटवर्क प्रालिमा लगेर खर्च गरेको कसुरमा अनुसन्धानका लागि लामिछाने, जिबी राईसहित १२ जनालाई पक्राउ गर्न कात्तिक ८ गते रुपन्देही जिल्ला अदालतले अनुमति दिएको थियो ।
सुप्रिम सहकारीबाट १ करोड ९६ लाख रवि लामिछानेकै नाममा र १४ करोड २९ लाख रुपैयाँ छविलाल जोशी, कुमार रम्तेलसहितका विभिन्न व्यक्ति र संस्थामार्फत गोर्खा मिडिया नेटवर्क प्रालिमा पुगेको संसदीय छानबिन विशेष समिति र रूपन्देही प्रहरीको अनुसन्धान प्रतिवेदनमा उल्लेख छ ।लामिछानेको नाममा बुटवल उपमहानगरपालिका–९ राजमार्ग चौराहा कार्यालय रहेको सुप्रिम बचत तथा ऋण सहकारी संस्थाबाट २०७७ चैत १८ मा २ करोड ऋण लिएको अनुसन्धानबाट खुलेको छ । २ करोडमध्ये संस्थाले काट्ने सेवा शुल्क कटाएर लामिछानेले १ करोड ९६ लाख ऋण लगेका छन् ।ऋण लैजाने क्रममा उनी गोर्खा मिडिया नेटवर्कमा कार्यकारी निर्देशक थिए । त्यस्तै गोर्खा मिडियाकै उपाध्यक्ष बञ्जाडेको नाममा पनि २ करोड ५० लाख रुपैयाँ ऋण लिएको अनुसन्धानबाट देखिएको छ । उनले २०७७ माघ २९ गते २ करोड ५० लाख मध्ये ५ लाख सेवा शुल्क कटाएर २ करोड ४५ लाख रुपैयाँ ऋण लिएको प्रतिवदेनमा देखिन्छ । लामिछाने र बञ्जाडे दुवैको नाममा गोर्खा मिडिया नेटवर्कको ग्लोबल आईएमइ बैंकको खातामा रकम जम्मा भएको अनुसन्धानले देखाएको छ ।
सहकारीका अध्यक्ष ओम प्रकाश गुरुङ भने पुर्पक्षका लागि जिल्ला कारागार रुपन्देहीमा रहेका छन् ।सुप्रिम सहकारीका १० हजार ३ सय ९१ बचतकर्ताले जम्मा गरेको १ अर्ब ७ करोड रकम मध्ये झण्डै ७८ करोड रकम सुप्रिमबाट अनियमित तबरले विभिन्न संघ संस्थामा लगेर खर्च गरिएको छ । संस्थाका पूर्व अध्यक्ष एवं अहिलेका संरक्षक गितेन्द्रबाबु राई, तत्कालीन सचिव दीपेश पुन, व्यवस्थापक सागर केसीसहित ३२ जना भन्दा बढी व्यक्तिले अनधिकृत रुपमा रकम लगेर खर्च गरेको अनुसन्धानबाट खुलेको छ ।तीमध्ये जिबी राई, सागर केसीसहितका २५ भन्दा बढी फरार छन् । सुप्रिमका अध्यक्ष ओमप्रकाश गुरुङ पुर्पक्षका लागि थुनामा छन् । रवि लामिछानेका नामबाट गोर्खा मिडिया नेटवर्कमा रकम जम्मा गर्ने सुप्रिमकी कर्मचारी रोशनी गुरुङसहित ६ जना धरौटी बुझाएर छुटेका छन् ।
थप समाचार
जनकल्याण साकोसको ३२ औं साधारणसभा सम्पन्न
राष्ट्रपति पौडेल स्वदेश फर्किए
