काठमाडौं – सामाजिक सञ्जाल फेसबूक तथा टिकटकमार्फत युवालाई फलो गर्ने र बिहे गरी अमेरिकामा लैजाने भन्दै ठगी गर्ने दुई जना युवतीलाई प्रहरीले पक्राउ गरेको छ । आफू डिभी परेर अमेरिका गएको र बिहे गरेर अमेरिका लैजाने भन्दै लाखौं ठगी गरेको आरोपमा महानगरीय अपराध महाशाखाले बाग्लुङको काठेगाँउपालिका वडा नं। २ घर भई भक्तपुरस्थित रोजभिलेज कोलोनीमा बस्दै आएका २ युवतीलाई प्रकाउ गरेको हो । प्रहरीका अनुसार प्रकाउ पर्नेमा २७ वर्षीया कोपिला शर्मा र १९ वर्षीया अमिसा केसी रहेका छन् । प्रहरीले यी दुईले पटक–पटक गरी ६ लाख ६० हजार रुपैयाँ ठगी गरेको जनाएको छ ।
प्रहरीले दुवैलाई ९ असारमा बुटवलबाट पक्राउ गरी ठगी मुद्दामा महानगरीय प्रहरी वृत्त ठिमी पठाएको छ ।प्रहरीका अनुसार युवतीहरूले सामाजिक सञ्जालमा पीडितलाई फलो गरिरहने, फ्रेन्ड रिक्वेस्ट पठाउने र फ्यान भएको भन्दै एसेप्ट गर्न बाध्य पार्ने गरेका थिए । पक्राउ परेकी कोपिला शर्माले आफूलाई अमेरिकाको डिभी परेको र हाल लकडाउनका कारण नेपालमा बस्दै आएको बताउने गरेकी थिइन् । उनीहरूले नेपालमा डिपार्टमेन्टल स्टोर सञ्चालन गर्ने र सो सञ्चालन गर्न पैसाको आवश्यकता परेको र पीडितलाई पार्टनर बनाउने भनी पटक–पटक गरी रु। ५ लाख ठगी गरेको प्रहरीले जनाएको छ ।
साथै कोपिला शर्माले बुबाको समेत फेक खाता बनाई ढुकुटीको पैसा तिर्ने बहानामा ठगी गरेको अनुसन्धानमा खुल्न आएको प्रहरीले जनाएको छ । प्रहरीले उनीहरूले आफूहरु अमेरिकाको डिभी होल्डर भएको भन्दै भक्तपुरका पीडितको छोरीसँग मित लगाएर अमेरिका लैजान्छु भन्दै रुपैयाँ १ लाख ६० हजार ठगी गरेको बताएको छ । साथै उनीहरूले फिल्म क्षेत्रका व्यक्तिहरूलाई समेत फेसबूकमा निक्की पौडेलका नाममा फेक खाता बनाई आफूसँग बिहे गरेर अमेरिका लैजाने भन्दै ठगी गर्न खोजेको प्रहरीले जनाएको छ ।
