ओलीको निरंकुशता चुड्कीको भरमा ध्वस्त पार्छौं: प्रचण्ड

प्रकाशित मिति:

१५ माघ, बुटवल-नेपाल कम्युनिष्ट पार्टी नेकपाको प्रचण्ड–माधव समूहका अध्यक्ष पुष्पकमल दाहाल प्रचण्डले श्री ३ महाराज बन्न चाहने केपी शर्मा ओलीको निरंकुशतालाई चुड्कीको भरमा ध्वस्त पार्ने बताएका छन् ।

ओलीलाई आफैले प्रस्ताव गरेर अध्यक्ष र प्रधानमन्त्री बनाएको स्मरण गर्दै प्रचण्डले केपी ओली सामन्ती निरंकुशताको एजेन्ट जस्तो देखिएको भन्दै प्रचण्डले ओलीको निरंकुशता केही महिना मात्र टिक्ने बताए । प्रतिनिधिसभा विघटनविरुद्ध सो समूहले बुटवलमा गरेको विरोधसभालाई सम्बोधन गर्दै प्रचण्डले सर्वोच्च अदालतले प्रतिनिधि सभा पुनःस्थापना गर्ने विश्वास व्यक्त गर्दै प्रचण्डले घुमाउरो भाषामा अदालतले नगरे जनताको अदालतले गर्ने बताए ।

‘ओलीको निरंकुशता चुड्कीको भरमा ध्वस्त हुने छ, केही महिनाभित्र’–प्रचण्डले भने–‘पंसद पुनस्थापना हुन्छ,अदालतप्रति विश्वास छ,तर सबभन्दा ठूलो अदालत जनता हो । ओलीले पार्टी एकता तोड्ने र संविधानको घाँटी रेट्ने काम गरेको प्रचण्डले आरोप लगाए । दुई वर्षभित्र आफ्नो पार्टी सरकारमा जाने र नयां नेपालको जग बसाल्ने प्रचण्डले बताए ।