विश्वासको मत नलिँदै नयाँ सरकार गठन प्रक्रिया प्रति कांग्रेसको आपत्ती

प्रधानमन्त्री केपी शर्मा ओलीले संसद‍मा विश्वासको मत नलिँदै राष्ट्रपति विद्यादेवी भण्डारीले नयाँ सरकार गठनको प्रक्रिया सुरु गरेपछि प्रमुख प्रतिपक्षी दल नेपाली कांग्रेसले आपत्ति जनाएको छ । राष्ट्रपति भण्डारीले शुक्रबार साँझ ५ बजेभित्र संविधानको ७६ को ५ अनुसारको नयाँ सरकार गठनका लागि आह्वान गरेसँगै कांग्रेसले यसलाई आपत्तिजनक र असंवैधानिक भनेको हो ।

कांग्रेस संसदीय दलका प्रमुख सचेतक बालकृष्ण खाँडले संविधानको धारा ७६ को ३ अनुसार नियुक्त प्रधानमन्त्रीले विश्वासको मत नलिएको र राजीनामा नदिएको अवस्थामा नयाँ सरकार गठन प्रक्रिया अघि बढाउनु असंवैधानिक भएको बताए । राष्ट्रपति भण्डारीले बिहीबार दलहरूलाई शुक्रबार साँझ ५ बजेसम्म बहुमत पुग्ने आधार प्रस्तुत गर्दै प्रधानमन्त्रीमा दाबी गर्न आह्वान गरेकी छिन् ।

प्रधानमन्त्री केपी शर्मा ओलीले मुलुकलाई अन्यौलमा राख्न जायज नहुने भन्दै धारा ७६ को ५ अनुसार सरकार गठनको प्रक्रिया थाल्न राष्ट्रपतिलाई आग्रह गरेपछि त्यस प्रक्रिया अघि बढेको राष्ट्रपतिल कार्यालयले जनाएको छ ।