भैरहवा, १८ जेठ । सेवा इन्टरनेशनल, नेपाल र हिन्दु स्वयंसेवक संघ, नेपालले भैरहवास्थित केशवधाममा १५ शैयाको कोभिड आइसोलेशन सेन्टर निर्माण गरी सञ्चालनमा ल्याएको छ । हिन्दु स्वयंसेवक संघ, नेपालको सिद्धार्थनगर–१३ सेवापथस्थित भैरहवाको नवनिर्मित कार्यालय भवनमा १५ शैयाको आइसोलेशन सेन्टर सञ्चालनमा ल्याइएको संघका विभाग कार्यवाह रविकान्त उपाध्यायले बताए । आइसोलेशन सेन्टरको मंगलबार लुम्बिनी प्रदेश सरकारका भौतिक पूर्वाधार विकास मन्त्री सन्तोष कुमार पाण्डेयले उद्घाटन गरेका छन् । सो अवसरमा बोल्दै मन्त्री पाण्डेयले विषम परिस्थितिमा हिन्दु स्वयंसेवक संघ र सेवा इन्टरनेशनलले आइसोलेशन सेन्टर निर्माण गरी भीम अस्पताललाई हस्तान्तरण गर्नु उदाहरणीय कार्य रहेको बताए । उनले भीम अस्पतालले विगतको तुलनामा धेरै कोरोना संक्रमित बिरामीहरुको उपचार गरेर निको पार्ने कार्यमा अग्रणी भूमिका निर्वाह गरेको बताए ।
‘हिन्दु स्वयंसेवक संघ, नेपालले गरेको यो पहिलो काम होइन, विगतका वर्षहरुदेखि नै नाम जस्तै संघले स्वयंसेवा गर्दै आएको छ, विभिन्न क्षेत्रमा संघले हात अगाडी बढाएको छ, ’मन्त्री पाण्डेयले भने । आफू स्वास्थ्यमन्त्री नभए पनि प्रदेश सरकारको मन्त्री भएकोले आवश्यक सहयोग गर्न तयार रहेको उनको भनाइ थियो ।भीम अस्पताल विकास समितिका अध्यक्ष नारायण प्रसाद भण्डारीले अस्पतालहरुमा बेडको अभाव भएको बेला सेवा इन्टरनेशनल र हिन्दु स्वयंसेवक संघले आइसोलेशन सेन्टर बनाउनु पुण्य काम भएको बताए । उनले अस्पताल हिन्दु स्वयंसेवक संघ संग सहकार्य गर्दै अगाडी बढ्ने बताए । समाजसेवी अजय कुमार गुप्ताले राज्यले सोचे अनुरुप बिरामीको उपचार तथा व्यवस्थापन गर्न नसकेको बेला गैरनाफामूलक संस्थाले १५ शैयाको आइसोलेशन सेन्टर बनाउनु स्वागतयोग्य कार्य भएको बताए । उनले आइसोलेशन सेन्टर यस क्षेत्रकै गहनाको रुपमा रहेको बताए ।
कोभिड आइसोलेशन सेन्टर निर्माण समितिका संयोजक उमाशंकर पाठकले अक्सिजन कन्सन्टेटर आउन केही ढिलाइ भएकोले आइसोलेशन सेन्टर सञ्चालनमा पनि थोरै ढिलाइ हुन पुगेको बताए । उनले समाज र देशको लागि केही काम गर्नुपर्छ भन्ने उद्देश्यले आइसोलेशनमार्फत कोरोना संक्रमित बिरामीको निःशुल्क उपचार१५ शैया मध्ये १० वटा बेड अक्सिजन कन्सन्टे«टर र ५ वटा सामान्य अवस्थाका बिरामीका लागि बिना अक्सिजन आइसोलेशन सेन्टर सञ्चालनमा ल्याएको हिन्दु स्वयंसेवक संघ नेपालका रुपन्देही जिल्ला सेवा प्रमुख सुरज उपाध्यायले बताए । उनले बिरामीको उपचारमा कुनै कमी नहोस् भन्ने उद्देश्यले औषधी लगायतका स्वास्थ्य सामग्री समेत राखिएको जानकारी दिए । आइसोलेशन सेन्टर भीम अस्पतालको मातहतमा सञ्चालन हुने गरी मंगलबार अस्पताल विकास समितिका अध्यक्ष नारायण प्रसाद भण्डारी र मेडिकल सुपरिटेण्डेण्ट डा. शकुन्तला गुप्तालाई हस्तान्तरण गरिएको हिन्दु स्वयंसेवक संघ, नेपालका भैरहवा नगर सेवा प्रमुख राजन शुक्लाले बताए ।
थप समाचार
मुख्यमन्त्री आचार्य चिन भ्रमणमा जाने
जिल्ला स्तरीय फुटवलको उपाधि शान्ति नमुनालाई
