अन्यायमा परेकी निर्मलाको पक्षमा पोष्टर टाँसे रबिले र राखे सरकारसँग यस्ता प्रश्न ……

१६ मंसिर २०७५, आईतवार ०   बिचार / प्रतिक्रिया


मङ्सिर १६ काठमाडौं । प्रसंग, आज पनि निर्मला पन्त कै । कञ्चनपुरकी १३ वर्षीया बालिका निर्मला पन्तको बलात्कार र हत्या भएको ४ महिना हुँदासम्म सरकारले दोषी पहिचान गरी कारवाही नगरेको विषयलाई लिएर प्रर्दशनहरु देशभर भएका छन् ।यसै क्रममा सरकार भेटियो तर न्याय भेटिएन भन्ने नारासहितका केही पोष्टर स्वतस्र्फुत रुपमा टाँसीएकोमा प्रहरीले उक्त पोष्टर उप्काएर फालेका थिए । केही दिन अघि नयाँ युगको प्रारम्भ भन्दै प्रधानमन्त्रीको तस्वीर सहितको पोष्टर टाँगिएको थियो ।जसलाई लिएर आम जनमानसमा प्रश्न प्रतिप्रश्न जागेका थिए । सँगसँगै सरकार र प्रधानमन्त्रीले चर्को आलोचना खेप्नु परेको थियो ।

एउटी बालिकाका लागि न्याय माग्न टाँसिएको पोष्टर उप्काउन पर्ने कारण के ?के शहरमा अब अन्यायमा परेकी चेलीका पक्षमा पोष्टर नै टाँस्न नपाइने ? हुन सक्ला निर्मला हत्या काण्डले विभिन्न पक्षलाई मुद्धा मसला पनि दिइरहेको होला । केही समुह र व्यक्तिहरुका लागि निर्मला एक बालिका मात्र नभई एउटा केश, बिषय र मसला पनि बनिरहेकी होलिन । जसले जुन सुकै स्वार्थ वा निश्वार्थ पोष्टर टाँसे पनि पोष्टरमा त यहि नै लेखिएको थियो कि सरकार त भेटियो तर न्याय भेटिएन, ‘जस्टिस डिले ड इज जस्टिस डि नाइड ।’अर्थात ढिला न्याय दिनु भनेको न्याय नदिनु हो । बलात्कारी र हत्यार सार्वजनिक नहुँदा यति सन्देश लेखिएका यि निर्जिव पोष्टरमा के खराबी छ र यिनलाई च्यात्नु प¥यो ? जसले जुन स्वार्थ वा फाइदा कै लागि यी पोष्टरहरु टाँसेपनि यि नले कसको के बिगार गर्छन् होला ।उल्टो यस्तो शान्तीपुर्ण र सांकेतिक गतिविधिहरु अत्यावस्यक छन् टायर बाल्ने, नेपाल बन्द गर्ने वा अन्य हिंसात्मक गतिविधि गर्ने काम भन्दा त यस्ता सन्देश बोकेका पोष्टरहरु कयौँ गुणा सिर्जनात्मक हुन । लोकतान्त्रिक सरकार ले यति जाबो विरोध पनि पचाउन सक्दैन भने सरकारको पाचन प्रणालीमा ठुलै खराबी छ ।

राम्रो चेक जाँच गराउनु पर्छ । त्यसमाथि पनि कुन पोष्टर टाँस्न पाउने, कुन नपाउने भन्ने नीति भए पनि लौ । प्रधानमन्त्रीको मात्र, सरकारको मात्र पोष्टर टाँस्न पाइन्छ, अरुको पाइदैन भन्ने कतै लेखिएको भए देखाई पाउँ नत्र सरकारले पोष्टर टाँस्न नदिने ठाँउ बा हेक र राज्य विरुद्धका सामाग्रीहरु लेखिएको पोष्टर बोहक सबै पोष्टरहरु मजाले टाँस्न पाउनु पर्छ ।४ महिनासम्म एउटा बलात्कारी र हत्यारा पत्ता नलाग्दा न्याय प्रेमीले न्याय देउ भनेर क्रियटिभ तरिकाले भनिरहँदा टाउको दुखेकोे छ भने टाउकाको पनि चेक जाँच गर्नु जरुरी देखिन्छ । हुन सक्छ, विपक्षी वा प्रतिपक्ष राजनीतिक दलहरुका लागि सरकारलाई औंला ठड्याउने बिषय वस्तु भइन् होला निर्मला, केही अधिकारकर्मीहरुका लागि दरिलो केश बनिरहेकी होलिन निर्मला, केही सञ्चारकर्मी र संचार माध्यमका लागि गतिलो हेडलाइन र स्कुप बन्दैछिन् होला निर्मला तर हाम्रा लागि अत्याचार र अन्यायको शिकार हुन् निर्मला ।

निर्मलाको बलात्कार र हत्यापछिको ४ महिनामा लगभग ५ सय बलात्कारका केश देखिएका छन् । त्यस कारणले पनि हाम्रो आवाज दरिलो र चर्को हुन जरुरी छ । आज पनि देश भर पोष्टर टाँस्ने र च्यात्ने काम भएछ । कसले के स्वार्थका लागि वा निस्वार्थमा किन पोष्टरहरु टाँस्ने र च्यात्ने काम गर्छ त्यो हामी जान्दैनाँै ।यो पोष्टर कसले बनायो, त्यो पनि हामी जान्दैनौ र जान्नु पनि छैन । तर यो पोष्टरमा लेखिएको कुरा सहि हो । ‘सरकार भेटियो, न्याय भेटिएन, जस्टिस डिलेड इज जस्टिस डिनाइड ।’त्यसैले आजको एपिसोडमा यो पोष्टर यो स्टुडियोको भित्तामा टाँस्ने छु । सरकार पोष्टर च्यात्ने भए कसैलाई पठाइदेउ, अबको ४० मिनेट करिब हामी यही छौ र पूरै कार्यक्रम भरी यो पोष्टर यही रहने छ ।(न्यूज२४नेपालबाट)

फेसबुकबाट तपाईको प्रतिक्रिया