सरकारको स्वस्थ आलोचना गर्नुस् : मुख्यमन्त्री पोखरेल

बागलुङ, असार २५ : गण्डकी प्रदेशका मुख्यमन्त्री कृष्णचन्द्र नेपाली पोखरेलले पत्रकारिता जगतले स्वस्थ र रचनात्मक आलोचनामार्फत सरकारलाई खबरदारी गर्नुपर्नेमा जोड दिएका छन्। नेपाल पत्रकार महासङ्घ बागलुङ शाखाको २१औँ स्थापना दिवसका अवसरमा आज ९शुक्रबार० ‘भर्चुअल’ माध्यमबाट शुभकामना दिँदै उनले पत्रकारिता जगत लोकतान्त्रिक प्रणालीको खम्बा भएको बताए।

‘सत्तामा गइसकेपछि सरकारको आँखाबाट कमीकमजोरी नदेखिन सक्,’ पत्रकार साथीहरुले स्वस्थ आलोचनामार्फत हामीलाई खबरदारी गर्नुस्,’ मुख्यमन्त्री पोखरेलले भने। उनले सङ्घीय लोकतान्त्रिक गणतन्त्र स्थापनालगायत हरेक परिवर्तनका आन्दोलनमा पत्रकारिता क्षेत्रले पुर्याएको योगदानको स्मरण र सम्मान गरे।

मुख्यमन्त्री पोखरेलले महासङ्घको संस्थागत विकास र पत्रकारको क्षमता अभिवृद्धिका लागि प्रदेश सरकारले सक्दो सहयोग गर्ने प्रतिबद्धता जनाए। उनले तीनै तहका सरकार र महासङ्घ एकअर्काका परिपूरक भएर कार्य गर्नुपर्ने बताए। सोही अवसरमा मुख्यमन्त्री पोखरेलले महासङ्घ बागलुङ शाखाको वेबसाइटको समेत उद्घाटन गगरेको शाखा अध्यक्ष नरेश कँडेलले जानकारी दिए।