काठमाडौं, साउन २ : संघीय संसदमा चौथो ठूलो दल जसपाका ६ जना सांसदले अध्यक्ष महन्थ ठाकुर र वरिष्ठ नेता राजेन्द्र महतोको साथ छाडेर अध्यक्ष उपेन्द्र यादव र संघीय परिषद् अध्यक्ष डा. बाबुराम भट्टराईको पक्षमा लागेका छन्। गत २१ जेठमा केपी ओली नेतृत्वको सरकारमा सहभागी हुन जसपाका २० सांसदले महन्थ-राजेन्द्र समूहलाई साथ दिएका थिए। ३२ मध्ये १२ सांसद मात्र उपेन्द्र-बाबुराम समूहमा रहेका थिए। महन्थ-राजेन्द्रलाई साथ दिएका ६ सांसद उपेन्द्र समूहमा आउने भएपछि १८ सांसदले प्रधानमन्त्री शेरबहादुर देउवालाई विश्वासको मत दिने भएका छन्।
कांग्रेसका ६१, माओवादी केन्द्रका ४९, जसपाका १८, राष्ट्रिय जनमोर्चा र स्वतन्त्र गरी एक सय ३० सांसद देउवाका पक्षमा उभिने निश्चित भएको छ। त्यो भनेको विश्वासको मत लिन आवश्यक एक सय ३६ सांसदमा ६ जना कम हो। एमालेको माधवकुमार नेपाल समूहले विश्वासको मत दिने बताइसकेको छ। तथापि, जसपाबाटै थप ६ सांसदलाई उपेन्द्र-बाबुराम समूहले आफ्नो पक्षमा तान्न सक्यो भने विश्वासको मतका पक्षमा भारी बहुमत जुट्ने छ।सांसदहरू नरमाया ढकाल, अमृता अग्रहरी, प्रमोद साह, रानी मण्डल, रुही नाज र दुलारीदेवी खत्वेनीले महन्थ-राजेन्द्रको साथ छाडेका हुन्।स्रोतका अनुसार ओली सरकारमा सहभागी हुन गएका उमाशंकर अरगरिया, विमल श्रीवास्तव, रेणुका गुरुङ र कलुदेवी विश्वकर्मालाई पनि महन्थ-राजेन्द्र समूहबाट आफ्नो पक्षमा तान्न सकिने बुझाइमा उपेन्द्र समूह छ।
यस्तै, सांसद्हरू शरतसिंह भण्डारी र निर्जला राउतसँग पनि वार्ता अगाडि बढाउने तयारी रहेको स्रोत बताउँछ। ६ जनालाई नै उपेन्द्र समूहले आफ्नो पक्षमा तान्न सक्यो भने जसपाका २४ जना प्रधानमन्त्री देउवाका पक्षमा उभिने सम्भावना छ। र, एमालेको माधवकुमार नेपाल समूहबाहेक नै देउवाका पक्षमा बहुमत जुट्ने छ।उपेन्द्र-बाबुराम समूहको अर्को रणनीति भनेको संसदीय दलमा महन्थ-राजेन्द्र समूहमा ४० प्रतिशत जुटाउन नदिने हो। प्रतिनिधिसभामा जसपाका ३२ मध्ये ४० प्रतिशत पु¥याउन महन्थ-राजेन्द्र समूहलाई १३ सांसद आवश्यक हुन्छन्। राष्ट्रियसभामा तीनमध्ये दुई सांसद उपेन्द्र-बाबुराम समूहमा छन्। त्यो भनेको राष्ट्रियसभामा महन्थ-राजेन्द्र समूह ३३.३३ प्रतिशतको मात्र हिस्सेदार छ, जसपाभित्र।
संवैधानिक व्यवस्थाअनुसार पार्टी विभाजन गर्न केन्द्रीय समिति र संसदीय दल दुवैमा ४०-४० प्रतिशत सदस्य अनिवार्य हुन्छ। त्यही ४० प्रतिशत पु¥याउन नदिने रणनीतिमा उपेन्द्र-बाबुराम समूह जुटेको देखिन्छ।शनिबार बिहान एमाले अध्यक्ष केपी ओलीको बालकोटस्थित निवासमै पुगेर महन्थ र राजेन्द्रले आफूहरू उनकै पक्षमा रहेको बताएका छन्। तर, ओली सरकारमा सामेल हुँदा उनीहरूको पक्षमा उभिएका जसपा सांसदहरू घट्ने क्रम जारी छ।
थप समाचार
रवि लामिछानेलाई कास्की अदालतमा उपस्थित गराइयो
माइतीघरमा रास्वपाको प्रदर्शन
रविलाई पक्राउ गर्न प्रहरीले लियो अदालतको अनुमति
