एमसीसी विरूद्ध बुटवलमा १० राजनीतिक दल/संगठनको विरोध प्रदर्शन हुने

बुटवल । मिलिनियम च्यालेन्ज कर्पोरेसन (एमसीसी) अमेरिकी परियोजना नेपाल र नेपालीको हित विरुद्ध रहेको भन्दै यसको खारेजीको लागी बुटवलमा १० राजनीतिक दल संगठनले संयुक्त विरोध प्रदर्शन गरेको बताएको छ ।मंगलबार बुटवलमा १० राजनीतिक दल/संगठनको बैठकले एमसीसी विरुद्ध मंगलबार (भदौ २२) गते बुटवलको ट्राफिक चोकमा विरोध प्रदर्शन गर्ने निर्णय गरेको छ । बैठकपछि संयुक्त प्रेस वक्तव्य जारी गर्दै उनीहरुले एमसीसी सम्झौताको देशव्यापी विरोध हुँदै आएको सन्दर्भमा यसलाई संसदबाट पास गराउन दवाव दिने उद्देश्यसहित उक्त परियोजनाका उच्च अधिकारी नेपाल भ्रमण गर्नु र सरकारले आकस्मिक रुपमा एमसीसी पास गर्ने उद्देश्य सहित संसद अधिवेशन बोलाउनु संयोग मात्र नभएर गम्भीर षड्यन्त्र रहेको बताएका छन् ।

वक्तव्यमा १० राजनीतिक दल÷संगठनले नेपालको सार्वभौमसत्ता तथा राष्ट्रिय स्वाधीनताको रक्षाको संघर्षमा एकताबद्ध हुन सम्पूर्ण देशभक्त नेपालीहरुमा अपिल गरेको छ । वक्तव्यमा एमसीसी परियोजना अमेरिकी सैन्य रणनीति हिन्द प्रशान्त रणनीतिको अभिन्न अंग भएको भन्दै त्यसले नेपालको असंलग्न परराष्ट्र नीतिमा गम्भीर नकरात्मक असर पु¥याउने बताइएको छ । वक्तव्यमा राष्ट्रिय जनमोर्चाका टानबहादुर खत्री, देशभक्त जनगणतान्त्रिक मोर्चा, नेपालका विनोद मरासिनी, नेकपाका खोमा तरामु मगर, नेकपा मालेका रघुनाथ अर्याल, वैज्ञानिक समाजवादी कम्युनिस्ट पार्टी, नेपालका डोलराज विश्वकर्मा, विवेकशील साझा पार्टीका केशवराज खनाल, राष्ट्रिय स्वाधीनताका लागी नागरिक मञ्चका पदम कार्की र राष्ट्रिय जागरण परिषद, नेपालका चित्रबहादुर थापाले हस्ताक्षर गरेका छन् ।

मंगलबार बुटवलको पुष्पलालबाट जुलुस सुरु गरी ट्राफिक चोकमा पुगेर कोणसभा गर्ने आयोजकले बताएको छ । कोणसभामा सम्पूर्ण देशभक्त, मजदुर, किसान, युवा, बिद्यार्थी, बुद्धिजीवी, उद्योगी, व्यापारी, पत्रकारलाई सहभागिताका लागी आयोजकले अनुरोध समेत गरेको छ । कोणसभामा केन्द्रीय नेताहरुले सम्बोधन गर्ने बताइएको छ ।