काठमाडौँ– सत्तारुढ दलहरुको गठबन्धनले अमेरिकी सहयोग नियोग मिलेनियम च्यालेन्ज कर्पोरेशन (एमसीसी) र नेपाल सरकारबीच भएको सम्झौता एमसीसी कम्प्याक्टबारे साझा धारणा बनाउन सकेन । एमीसीकी उपाध्यक्ष फातेमा सुमार नेतृत्वको एमसीसी प्रतिनिधिमण्डल बिहीबार काठमाडौँ आइपुगेको छ ।शुक्रबार सो प्रतिनिधिमण्डलले प्रधानमन्त्री शेरबहादुर देउवालाई भेट्ने कार्यक्रम तय भएको छ । सो भेट अगाडि नै गठबन्धनको साझा धारणा बनाउन भन्दैै प्रधानमन्त्री देउवाले बिहीबार बालुवाटारमा बैठक राखेका थिए । तर, सो बैठकले कुनै निस्कर्ष ननिकालेको बैठकमा सहभागी एक नेताले जानकारी दिए । सत्ता गठबन्धनका माओवादी केन्द्र अहिलेकै अवस्थामा एमसीसी कम्प्याक्ट अनुमोदन गर्न नहुने पक्षमा छ भने माधवकुमार नेपाल नेतृत्वको नेकपा ९एकीकृत समाजवादी०ले आफ्नो धारणा सार्वजनिक गरेको छैन । तर, सो पार्टी निकट विद्यार्थी संगठनले भने एमसीसीको विरोध गर्दै आएको छ ।
सरकारको नेतृत्व गरिरहेको कांग्रेस भने एमीसी पारित गर्नुपर्ने पक्षमा छ । सत्ता गठबन्धनमै एमसीसीबारे समान धारणा नरहेकाले प्रधानमन्त्री देउवा अप्ठ्यारोमा परेका छन् । त्यसैले उनले बिहीबार साझा धारणा बनाउन बैठक बोलाएका थिए । तर, बिहीबारको बैठकमा सत्तारुढ गठबन्धनको एक घटक जनता समाजवादी पार्टीका अध्यक्ष उपेन्द्र यादव उपस्थित हुन नसकेपछि कुनै निर्णय नगरिएको एक नेताले बताए । उनले एमीसीबारे छलफल भने भएको बताए ।बैठकमा प्रधानमन्त्री तथा कांग्रेस सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड, नेकपा ९एकीकृत समाजवादी०का अध्यक्ष माधवकुमार नेपाल, राष्ट्रिय जनमोर्चाकी उपाध्यक्ष दुर्गा पौडेल, गृहमन्त्री बालकृष्ण खाँण, कानुनमन्त्री ज्ञानेन्द्रबहादुर कार्कीलगायतको उपस्थिति थियो ।
यस्तै बालुवाटारमा मन्त्रिपरिषद विस्तारबारे पनि गठबन्धनबीच छलफल भएको छ । तर, मन्त्रिपरिषद कहिले विस्तार हुन्छ भन्ने विषय भने टुंगो लागेको छैन । प्रधानमन्त्री देउवाले शुक्रबार नै मन्त्रिपरिषद विस्तार गर्ने तयारी गरेका छन् । तर गठबन्धनले यो विषय पनि नटुंग्याएकोले शुक्रबार मन्त्रिपरिषद विस्तार हुने सम्भावना कम रहेको छ । शुक्रबार पनि गठबन्धनको बैठक बस्ने तय भएको छ । सो बैठकपछि एमसीसी र मन्त्रिपरिषद विस्तारबारे निर्णय हुन सक्ने जनाइएको छ ।बिहीबारको बैठकमा प्रम्ख प्रतिपक्षी दल नेकपा एमालेले संसद् अवरोध गरेको विषयसमेत छलफल भएको थियो ।
थप समाचार
पाथीभरा क्षेत्रमा मदिरा बिक्री तथा सेवनमा प्रतिबन्ध
