ओली-ठाकुर गठबन्धन दक्षिणपन्थी : माधवकुमार नेपाल

प्रकाशित मिति:

काठमाडौँ-नेकपा (एकीकृत समाजवादी) का अध्यक्ष माधवकुमार नेपालले नेकपा एमालेका अध्यक्ष केपी शर्मा ओली र लोकतान्त्रिक समाजवादी पार्टीका अध्यक्ष महन्थ ठाकुरको गठबन्धन दक्षिणपन्थी भएको आरोप लगाएका छन् ।युवा संघ, नेपाल लुम्बिनी प्रदेशद्वारा शनिबार नेपालगञ्जमा आयोजित प्रदेश भेला एवं पिपुल्स भोलेन्टियर घोषणा कार्यक्रममा अध्यक्ष नेपालले ओलीको दक्षिणपन्थी गठबन्धन सबै उपलव्धीलाई तुहाउन चाहनेको गठबन्धन भएको आरोप लगाए ।

उनले आफुहरूको गठबन्धन मुलुक निर्माणका लागि भएको भएको दाबी गरे । एमाले अध्यक्ष ओलीप्रति आक्रमक देखिएका नेपालले ओलीमा क्रान्तिकारी ज्वाला निभिसकेको बताए । उनले एमालेलाई ओलीको निजी कम्पनीको रूपमा परिणत भएको आरोप लगाए ।त्यस्तै उनले एमसीसी नेपालको हितमा छ भन्ने ग्यारेन्टी भएपछि मात्रै अघि बढाइने बताए । एमसीसीका प्रतिनिधिहरूसँगको भेटमा उनले नेपाल स्वतन्त्र राज्य भएको भन्दै सुरक्षासँग परियोजना जोडिएको छ कि छैन भन्ने प्रश्न गरेको बताए ।

कार्यक्रममा केन्द्रीय सदस्यहरू दलबहादुर सुनार, कौशिला सिंह, कैलालीका अध्यक्ष दीर्घ सोडारी, रुपन्देहीका अध्यक्ष राजु गुरुङ, युवा संघका अध्यक्ष नरेश शाही, युवा संघ लुम्बिनी इन्चार्ज सरिता श्रीस लगाएतले पार्टीलाई मजबुद बनाएर अघि बढ्ने जनाएका थिए ।