बागलुङमा एक- एक लाखका २ स्मृति पत्रकारिता पुरस्कार स्थापना

प्रकाशित मिति:

कौरव खत्री,बागलुङ १९ कात्तिक । प्रेस सेन्टर नेपाल बागलुङले एकैसाथ दुई वटा पुरस्कार कोष स्थापना गरेको छ । प्रेस सेन्टर नेपाल बागलुङको पाचौं जिल्ला सम्मेलनका अवसरमा नगद रु १÷१ लाखको पुरस्कार स्थापना गरिएको प्रेस सेन्टर नेपाल बागलुङका अध्यक्ष थम्मन थापा सन्देशले जानकारी दिए । गलकोट नगरपालिका वडा नं ७ मल्म हाल जापानमा कर्म गरिरहेका दुई युवाहरु हर्क थापा र विकास खडका ’सुन्दर’ले आफ्ना दिवंगत माता पिताको सम्मान र सम्झनामा एक ÷एक लाखको स्मृति पत्रकारिता पुरस्कार कोष स्थापना भएको अध्यक्ष थापाले बताए ।

नेपाल कम्युनिष्ट पार्टी माओवादी केन्द्र निकट जनप्रगतिशील मञ्चका एशिया प्यासिफिक संयोजक तथा गलकोट समाज जापानका पूर्व अध्यक्ष समेत रहेका युवा समाजसेवी हर्क थापाले आफ्ना दिवंगत पिता भक्तबहादुर थापा र माता जगकुमारी थापाको स्मृतिमा १ लाखको पुरस्कार कोष स्थापना गरेका हुन । स्वर्गिय बाबा भक्त बहादुर थापा साविक मल्म गा.वि.स वडा नम्बर ७ का वडा पूर्व वडा सदस्य समेत बन्नुभएको थियो । यसैगरी तत्कालिन नेपाल कम्युनिष्ट पार्टी माओवादी बागलुङ जिल्ला सदस्य तथा सामाजिक संस्था घुम्टे युवा परिवार जापान शाखाका सल्लाहकार समाजसेवी विकास खडका (सुन्दर)ले आफना दिवंगत पिता श्याम बहादुर खडका र माता चन्द्रकली खडकाको स्मृतिमा नगद रु १ लाखको पुरस्कार कोष स्थापना गरेका छन । स्वर्गीय श्याम बहादुर खड्का साविक मल्म गाविस वडा नम्वर ९ का पूर्व वडा अध्यक्ष समेत हुनुहुन्थ्यो ।

पत्रकारिका समाजको ऐना हो यसले आम नागरिकलाई सहि सुचना प्रदान गर्दै पत्रकारिता मार्फत समाजको संम्वृद्विमा टेवा पुगोस, पत्रकारिताको विकास र यसमा थप आकर्षण बढाउने उद्येश्यले पुरस्कारको अक्षयकोष स्थापना गरिएको पुरस्कारको अक्षयकोषकर्ता हर्क थापा र विकास खड्का (सुन्दर)ले बताए ।दुवै पुरस्कार कोषको बार्षिक ब्याजबाट प्राप्त हुने रकम मार्फत जिल्लामा निष्पक्ष, जनउत्तरदायी, व्यावसायिक, खोजमूलक र विश्लेषणात्मक समाचार मार्फत सक्रिय २ जना पत्रकारलाई प्रत्येक वर्ष पुरस्कृत गरिने सेन्टरका उपाध्यक्ष सज्जन कुमार सिंहले बताए । त्यसका लागि आवश्यक कार्यविधि तयार गरेर कोष र पुरस्कार वितरणलाई व्यवस्थित बनाइने उनको भनाई छ । सेन्टरले बागलुङमा पहिलो पटक स्मृति पुरस्कार स्थापना गरेको संगठनका सचिव अनिश खातीले जानकारी दिए ।