नयाँ दिल्ली, २७ मंसिर । भारतमा भइरहेको विधानसभा निर्वाचनको मत परिणाम आश्चर्यजनक देखिएको छ । अहिलेसम्म पाँच वटा राज्यमध्ये तीनवटा राज्यमा सत्तारुढ भारतीय जनता पार्टी (भाजपा) लाई पछाडि पार्दै कंग्रेसले सरकार बनाउने पक्कापक्की भएको छ।
छत्तीसगढ, राजस्थान र मध्यप्रदेशमा कंग्रेस नेतृत्वमा सरकार गठन हुने भएपछि भाजपा विपक्षमा पुगेको छ । यसअघि यी राज्यमा भाजपाले सत्ता सम्हाल्दै आएको थियो ।
निर्वाचनमा भारतीय प्रधानमन्त्री नरेन्द्र मोदी, बीजेपी अध्यक्ष अमित शाह, उत्तर प्रदेशका मुख्यमन्त्री योगी आदित्यनाथको समूह प्रचार प्रसारमा खटिएको थियो । कंग्रेसका तर्फबाट अध्यक्ष राहुल गान्धी प्रचारप्रसारमा खटिएका थिए ।
सन् २०१९ को लोकसभा चुनावको सेमिफाइनलको रूपमा हेरिएको निर्वाचन परिणामले भाजपालाई नराम्रो धक्का दिएको छ।
दुई सय ३० सिट रहेको मध्यप्रदेशमा कंग्रेसले एक् सय १४ सिटमा जित हासिल गरेको छ । बहुमतको सरकार बनाउन एक११६ सिट आवश्यक रहेकोमा कंग्रेसलाई दुई सिट मात्रै अपुुग छ । कंग्रेसलाई आवश्यक दुई सिटमा बहुजन समाजवादी पार्टीले समर्थन गर्ने बताइसकेको छ । एक सय नौ सिट जितेर भाजपाले मुख्य विपक्षी दलमा चित्त बुझाउनुपर्ने भएको छ ।
९० सिट रहेको छत्तीसगढमा कंग्रेसको भारी बहुमत छ । सरकार बनाउन ४६ सिट आवश्यक पर्नेमा कंग्रेसले ६८ सिट जितेको छ । सन् २०१३ को निर्वाचनमा ४९ सिट जितेर सरकार बनाएको भाजपा अहिले १५ सिटमा खुम्चिएको छ।
राजस्थानमा पनि कंग्रेसलाई सरकार बनाउन थप एक सिट आवश्यकता पर्छ । दुई सय सिट रहेको राजस्थानमा कंग्रेसले १०० सिटमा जित हात पारेको छ भने भाजपा विगतको भन्दा ९० सिट गुमाउँदै ७३ सिटमा सीमित भएको छ । कंग्रेसलाई सरकार बनाउन बहुजन समाजबादी पार्टीकी मायावतीले समर्थन गर्ने बताइसकेकी छन् । राजस्थानमा कंग्रेसको सरकार गठन हुने पक्का भएको छ।
तेलंगनामा भने भाजपा र कंग्रेसलाई घाटा लागेको छ । यहाँ फेरि एकपटक टिआरएसले नै सरकार बनाउने भएको छ।
तेलंगना राष्ट्रिय समिति टिआरएसले यसअघिको निर्वाचनका भन्दा २५ सिट बढी जितेको छ । अहिले ८८ सिट जितेको टिआरएसलाई बहुमतका लागि जम्मा ६० सिट आवश्यक पर्छ ।
तेलंगनामा कंग्रेसले १६ सिट गुमाउँदै २१ सिटमा जित हात पार्दा भाजपाले चार सिट गुमाउँदै एक सिटमा मात्र जित हात पारेको छ ।
४० सिट रहेको मिजोरममा मिजो नेसनल फ्रन्ट (एमएनएफ)ले २६ सिट जित्दै सरकार बनाउने भएको छ । यसअघिको निर्वाचनमा जम्मा पाँच सिट जितेको एमएनएफले यसपटक कंग्रेसलाई पछि पार्दै सत्तामा पुगेको हो। कंग्रेसले पाँच सिट जित्दा भाजपाले पहिलोपटक एक सिट जितेको छ।
थप समाचार
पोर्चुगलमा अन्र्तराष्ट्रिय साहित्य सम्मेलन हुँदै
