प्रथम चापाकोट महोत्सव तथा व्यापार मेलाको तयारी पूरा !

२७ मंसिर २०७५, बिहीबार ०   बिचार / प्रतिक्रिया
16 Shares


मङ्सिर २७ स्याङ्जा ।  स्याङ्जाको दक्षिणी भेगमा रहेको चापाकोटमा भोलि मङ्सिर २८ गतेदेखि हुने प्रथम चापाकोट महोत्सव तयारी पूरा भएको छ । चापाकोट उद्योग वाणिज्य सङ्घको आयोजनामा हुने महोत्सवको तयारी पूरा भएको महोत्सव मूल आयोजक समितिका संयोजक एवं चापाकोट उद्योग वाणिज्य सङ्घका अध्यक्ष मणिप्रसाद खनालले बताउनुभयो ।

“स्याङ्जाको दक्षिणी भेगमा कालीगण्डकीको किनारमा रहेको समथर भूभाग चापाकोट धार्मिक, ऐतिहासिक, पर्यटकीय एवं कृषि उत्पादनका दृष्टिले पनि जिल्लाकै महत्वपूर्ण क्षेत्र हो” महोत्सव मूल आयोजक समितिका संयोजक खनालले भन्नुभयो, “यस क्षेत्रमा रहेका सम्भावनाको खोजी गर्ने र यसको विकासका लागि सहयोग पु¥याउनुका साथै चापाकोटलाई राष्ट्रिय तथा अन्तर्राष्ट्रिय क्षेत्रमा चिनाउने उद्देश्यले महोत्सवको आयोजना गर्न लागेका हौँ ।”

महोत्सवमा स्थानीय उत्पादनसँग जोडिएका कृषि, पशु, हस्तकला, कुमाल समुदायको लोपोन्मुख अवस्थामा रहेका माटाका भाँडा तथा स्थानीय कला, संस्कृतिको प्रचारप्रसार, स्थानीय खानाका परिकारलाई प्राथमिकताका साथ महोत्सव अवधिमा प्रदर्शन गरिने आयोजकले जनाएको छ ।

कूल २२० वटा विभिन्न प्रकृतिका स्टल मेलामा रहने छन् । मङ्सिर २८ देखि पुस ८ गतेसम्म सञ्चालन हुने महोत्सवका लागि विभिन्न ४० उपसमिति निर्माण गरी तयारी गरिएको छ ।

महोत्सव अवधिभर कुल रु ८० लाख आर्थिक सङ्कलन गर्ने, ६० लाख खर्च हुने र २० लाख बचत हुने प्रारम्भिक अनुमान रहेको मेला आयोजक समितिका संयोजक खनालले बताउनुभयो । बचत रकमबाट चापाकोट उद्योग वाणिज्य सङ्घको कार्यालय भवनको शुरुआत गर्ने र व्यापारीको हितमा प्रयोग गर्नका लागि कोष स्थापना गर्ने निर्णय भएको चापाकोट उद्योग वाणिज्य सङ्घले जनाएको छ ।

फेसबुकबाट तपाईको प्रतिक्रिया