१८ माघ, काठमाडौं । प्रमुख प्रतिपक्षी दल नेकपा एमाले निकट राष्ट्रिय युवा संघले स्वास्थ्यमन्त्री विरोध खतिवडाविरुद्ध अख्तियार दुरुपयोग अनुसन्धान आयोगमा उजुरी दिएको छ । कोभिड–१९ विरुद्धको २४ लाख खोप गायब गरेर मन्त्री खतिवडाले राज्यकोषको २ अर्ब ५० करोड रुपैयाँ हिनामिना गरेको आरोप लगाउँदै संघले अख्तियारमा उजुरी दिएको हो ।
मन्त्री खतिवडाले स्वास्थ्य तथा जनसंख्यामन्त्रीको जिम्मेवारी बहन गरेपछि २४ लाख डोज खोप हराएको आरोप युवा संघले लगाएको छ ।मन्त्री खतिवडा र यस कार्यमा संलग्न व्यक्तिहरु उपर छानविन गरी भ्रष्टाचार निवारण ऐन, २०५९ को दफा ३, ८ र १७ तथा अन्य कानूनी प्रावधान बमोजिम कारबाही गर्न माग गरिएको युवा संघका अध्यक्ष किरण पौडेलले जानकारी दिए । जनताको सुरक्षाको ग्यारेन्टी लिएको सरकार र स्वास्थ्य मन्त्रालयभित्रबाटै खोप हराउनु लज्जास्पद र जनघाति कदम भएको उनको भनाइ छ ।
स्वास्थ्यमन्त्री खतिवडा र खोप गायब प्रकरणमा संलग्न अन्य व्यक्तिहरुमाथि छानविन गरी आवश्यक कारबाहीको प्रक्रियामा ल्याउनको निम्ति अख्तियारमा उजुरी गरिएको उनले बताए ।
थप समाचार
