काठमाडौं, ७ पुस – सत्तारुढ नेपाल कम्युनिष्ट पार्टी (नेकपा)का बरिष्ठ नेताद्वय माधवकुमार नेपाल र झलनाथ खनालले सरकारको काम कारवाही र पार्टीको कार्यशैलीप्रति असन्तुष्टि व्यक्त गरेका छन् । पार्टी केन्द्रीय कार्यालय धुम्बराहीमा जारी स्थायी समितिको शनिवारको बैठकमा बोल्दै नेता नेपालले सरकारले पार्टीसँग समन्वय नगर्दा दुई तिहाइ बहुमतको सरकारले पनि केही काम गर्न नसकेको आरोप लगाए । उनले पार्टी एकीकरणको विधिमा केही त्रुटि रहेको बताए ।
उनले प्रदेश कमिटि गठनप्रति असन्तुष्टि जनाएका थिए । अर्का नेता खनालले अध्यक्षद्वयको राजनीतिक प्रतिवेदनमा क्रान्तिको चरणबारे उल्लेख धारणा नमिलेको बताएका थिए । पार्टी एकीकरणको काम पूरा नहुँदा कार्यकर्तामा अन्यौलता सिर्जना भएको तथा सरकारले गरेका केही नियुक्तिका कारण जनतामा निराशा छाएको बताएका थिए । शनिवार गिरिराजमणी पोखरेल, विष्णुप्रसाद पौडेल, रामबहादुर थापा, झलनाथ खनाल र माधवकुमार नेपालले राजनीतिक प्रतिवेदनका सम्बन्धमा आआफ्नो विचार व्यक्त गरेका थिए ।
थप समाचार
एमाले ‘मिसन ८४’ मा छ : ओली
