सिड्नी । नेपाली कांग्रेसका झापा जिल्ला पूर्व अध्यक्ष एवं प्रदेश १ अध्यक्ष उद्धव थापाले सीप र ज्ञान लिएर नेपाल फर्कन झापाली लगायत सबै नेपालीहरूलाई आव्हान गर्नुभएको छ । प्रवासमा बस्ने नेपालीहरूले नेपालमा लगानी मात्र गरेर समृद्ध नेपाल बन्न सक्दैन, विदेशिएको दक्ष जनशक्ति र विदेशमा आर्जन गरेको सीप र शिक्षा लिएर नेपाल फर्केमात्र नेपालका गाउ र शहरको विकास हुने बिचार राख्दै अनुरोध समेत गर्नुभएको छ। छोटो अष्ट्रेलिया बसाइका क्रममा अवलोकन गर्दा नेपालीहरूको प्रगति, उन्नति र राजनीतिक पहुँच प्रति आफू अत्यन्तै खुसी भएको थापाले बताउनु भएको छ । जहाँ रहेपनि हामी नेपालीले नेपाली भाषा बिर्सन नहुने सन्देश जस्ता विषयमा सबैलाई ध्यानाकर्षण गराउनु भएको छ । झापाली समाज अष्ट्रेलियाले थापाको सम्मानमा सिड्नी शहरमा राखेको एक सन्ध्याकालमा कार्यक्रममा उक्त बिचारहरू राख्नु भएको थियो ।
समाजका अध्यक्ष निरञ्जन प्रसाईँको अध्यक्षतामा आयोजित कार्यक्रममा संस्थापक अध्यक्ष एवं संरक्षक दिनेश पोखरेल, संरक्षक भवानी ओली, दीपक चुडाल, उमेश पोखरेल, संस्थापक सदस्य एवं जनसम्पर्क समिति अष्ट्रेलियाका पूर्व अध्यक्ष कृष्ण गिरी, सन्तोष सिटौला अझास का भूतपूर्व महासचिव रूपराज मैनाली, भूपाल सिटौला, सचिव अजय राजवंशी, तीर्थ खतिवडा, काठमाण्डु प्रदेश १ नेका सम्पर्क समितिका अध्यक्ष निर्मल रिजाल लगायत झापाली समाज अष्ट्रेलियाका पदाधिकारी तथा सदस्यहरूको उपस्थिति रहेको थियो ।
जिल्लाका नेताहरुलाई आफनो कर्मथलो अष्ट्रेलियामा स्वागत गर्न पाउनु एउटा गर्विलो अवसर भएको उपाध्यक्ष निरज खतिवडाले बताउनुभयो । अधिकांस वक्ताहरूले झापाली समाज अष्ट्रेलियाले हिजोका दिन जस्तै भोलीका दिनहरुमा पनि झापाको बिकासमा सहकार्य र सहयोगी भूमिका निभाउने र राजनितिक दल एवं जिल्लाका नेताहरुको स्थानीय स्तरमा आपसी सद्भावको अपेक्षा राखेको कुरा महासचिव तिर्थ कार्कीले जानकारी दिनुभयो ।भ्रमणमा रहनु भएका अतिथि थापा र रिजाललाई झापाली समाज अष्ट्रेलियाको तर्फबाट दिनेश पोखरेल, भवानी ओली, उमेश पोखरेल र निरन्जन प्रसाईले खादा र मायाको चिनोले सम्मान समेत गर्नुभएको थियो ।
