बुटवल, असार । नेपाल पत्रकार महासंघ रुपन्देहीका पूर्व अध्यक्ष, लेखक तथा साहित्यकार, अग्रज पत्रकार दीपक ज्ञवाली बुटवल मिडिया प्रकाशन प्रा.लि. द्वारा सञ्चालित अनलाइन दैनिकपत्र डटकम को सल्लाहकार सम्पादक पदमा चयन हुनुभएको छ ।रुपन्देहीबाट प्रकाशित स्थापित पत्रिकाहरुमा सम्वाददाता, सह–सम्पादक, कार्यकारी सम्पादक र सम्पादकको महत्वपूर्ण भूमिका निर्वाह गरिसक्नु भएका कुशल पत्रकार ज्ञवालीले बुटवलबाट प्रकाशित फरक राष्ट्रिय साप्ताहिकको प्रकाशक तथा सम्पादकको भूमिका समेत निर्वाह गरिसक्नु भएको छ ।राजधानी काठमाडौंबाट प्रकाशित हिमाल म्यागेजिनको विशेष सम्वाददाता भई खोजमुलक रिपोर्टिङ्ग गरी ख्यातीप्राप्त गर्नुभएका ज्ञवाली अहिले गोरखापत्र संस्थानमा विज्ञ सल्लाहकारका रुपमा रहनु भएको छ ।
कलिलो उमेरदेखि नै लेखन, पत्रकारिता र साहित्य क्षेत्रमा क्रियाशील हुँदै जीवनको लामो र संघर्षशील यात्रा गरिरहनु भएका पत्रकार ज्ञवाली इमान्दार र निष्ठावान् पत्रकारका रुपमा सुपरिचित हुनुहुन्छ ।बुटवल साहित्य कला प्रतिष्ठानको अध्यक्ष भएर कुशलतापूर्वक जिम्मेवारी वहन गरिसक्नु भएका ज्ञवालीको जन्म २०३२ साल माघ १२ गते गुल्मी जिल्लाको रुरु – २ बम्घा पाहागामा भएको हो । स्नातकोत्तर तहको शैक्षिक योग्यता हासिल गर्नुभएका ज्ञवालीले २०४९ सालदेखि पत्रकारिता यात्रा सुरु गरी अविछिन्न रुपमा क्रियाशील हुनुहुन्छ ।पत्रकारिता र अनुसन्धानात्मक रिपोर्टिङ्गमा उत्कृष्टता हासिल गर्नुभएका आधारमा ज्ञवालीले गोरखापत्र उत्कृष्ट पत्रकारिता पुरस्कार (काठमाडौं), उत्कृष्ट वातावरण राष्ट्रिय पत्रकारिता पुरस्कार (काठमाडौं), उत्कृष्ट पत्रकारिता पुरस्कार (रुपन्देही) लगायतका दर्जनौं पुरस्कारहरुबाट पुरस्कृत एवं सम्मानित हुनुभएको छ ।
थप समाचार
