तिलोत्तमामा हुने प्रदेशस्तरीय ब्याडमिन्टन प्रतियोगिताको तयारी पूरा, मेयर खांणले भोलि बिहान ९ बजे उद्घाटन गर्ने

सबलपोष्ट

तिलोत्तमा । तिलोत्तमा १ डाइभर टोलको नवीन ज्योति क्लबले चैत २४ गते शनिबारदेखि आयोजना गरेको प्रदेशस्तरीय ब्याडमिन्टन प्रतियोगिताको तयारी पूरा भएको छ ।

लुम्बिनी प्रदेशभित्र रहेका खेलाडीहरुमा भएको कला, क्षमता प्रदर्शनको अवसर प्रदान गर्ने र प्रदेशमै खेलाडीहरु उत्पादन गर्ने उद्देश्यले दोस्रो नबिन ज्योति कप पुरुष डबल ब्याडमिन्टन प्रतियोगिता गर्न लागेको हो ।

तिलोत्तमा व्याडमिन्टन क्लबको कभर्ड हल तिमोत्तमा वडा नं ६को दश नम्बरस्थित खेल मैदानमा हुने प्रतियोगिताको तिलोत्तमाका मेयर रामकृष्ण खांणले भोलि बिहान ९ बजे उद्घाटन गर्ने कार्यक्रम तय भएको क्लबका अध्यक्ष कृष्ण पाण्डेले जानकारी दिए ।

प्रतियोगिताको विजेताले ३० हजार, उपविजेताले २० हजार र तेस्रोले १० हजार रुपैया नगद पुरस्कारका साथै ट्रफी,मेडल र प्रमाणपत्र पाउने छन् भने उदियमान खेलाडीलाई नगद पुरस्कारले सम्मानित गरिनेछ ।

प्रतियोगितामा लुम्बिनी प्रदेशभित्रका मात्र खेलाडीहरु सहभागी हुनुपर्ने, मेभिस ३५० शटल कक प्रयोग गर्नुपर्ने,खेलाडीहरु आफ्‌नो क्लवको जर्सीमा उपस्थित हुनुपर्ने लगायत नियम रहेका छन् । प्रतियोगितामा भाग लिने खेलाडीहरुलाई खाना तथा नास्ताको क्लबले व्यवस्था गर्ने खेल संयोजक बिक्रम गुरुङ्गले बताए ।