प्रकाश न्यौपाने- भैरहवा, मंसिर । भैरहवामा जारी रुपन्देही सुपरलिग क्रिकेट प्रतियोगितामा गोलपार्क क्रिकेट क्लब विजयी भएको छ । डिभिजन ‘बी’ अन्तर्गत सोमबारको खेलमा शंकरनगर क्रिकेट क्लबलाई ४ विकेटले पराजित गर्दै गोलपार्कले जित निकाल्न सफल भएको हो ।सिद्धार्थ क्रिकेट मैदानमा टस जितेर ब्याटिङ गरेको शंकरनगरले निर्धारित ५० ओभरको खेलमा ३९ ओभर ५ बल खेल्दै सबै विकेट गुमाएर १ सय १३ रनको सामान्य लक्ष्य प्रस्तुत गर्यो । उसका लागि रिदम भट्टराईले २२ र विपिन भट्टराईले अविजित १४ रन बनाए पनि अन्य ब्याटरले दोहोरो अंकमा रन बटुल्न सकेनन् । शंकरनगरले अतिरिक्त ४२ रन पायो ।
बलिङमा गोलपार्कका प्रदीप भण्डारीले ८ ओभर ५ बलमा १ मेर्डनसहित २० रन खर्चेर ५ विकेट लिए । यस्तै, प्रशान्त जिसीले ३ तथा शिवकुमार मौर्य र युवराज सुवेदीले १–१ विकेट लिए ।१ सय १४ रनको सामान्य लक्ष्य पछ्याएको गोलपार्कले २० ओभर १ बलमा ६ विकेट गुमाएर १ सय १७ रन बनाउँदै सहजै जित निकाल्यो । उसको जितमा शिवकुमार मौर्यले ५५ रनको अर्धशतकीय पारी खेल्दा संगम न्यौपानेले १८ रनको योगदान गरे ।बलिङमा शंकरनगरका शौरभ पाण्डेले २ तथा विपिन भट्टराई, जय गोदार, बद्रे आलम र सम्राट थापाले समान १–१ विकेट लिए । खेलमा गोलपार्कका प्रदीप भण्डारी प्लेयर अफ द म्याच भई एक हजार दुई सय रुपैयाँ प्राप्त गरे ।रुपन्देही क्रिकेट संघको आयोजनामा जारी प्रतियोगिताको विजेता टिमले नगद १ लाख १ रुपैयाँ र उपविजेताले ५० हजार १ रुपैयाँ नगदसहित ट्रफी, मेडल र प्रमाणपत्र प्राप्त गर्नेछन् । यस्तै, हरेक खेलको म्यान अफ द म्याचले १ हजार दुई सय, म्यान अफ द सिरिजले १५ हजार, बेष्ट ब्याटर, बेष्ट बलर र उदयीमान खेलाडीले जनही ५ हजार रुपैयाँ पाउने संघका कोषाध्यक्ष तथा खेल संयोजक निरजप्रताप खाँणले जानकारी दिए ।रुपन्देहीका ‘ए’ डिभिजनका ८ र ‘बी’ डिभिजनका १२ गरी २० टिम सहभागी छन् । यसपटक नेपाल सुपरलिगका कारण दुईचरणमा सुपरलिग हुनेछ । पहिलो चरणमा मंसिर १२ गतेसम्म ‘बी’ डिभिजनका खेलहरु हुनेछन् भने ‘ए’ डिभिजनका खेलहरु नेपाल सुपरलिग पछि आयोजना हुनेछ ।
थप समाचार
माघ १० देखी २१ सम्म प्रथम सरावल मेला हुने
