सूर्य नगर गोल्ड कपमा आयोजकलाई पराजित गर्दै बाँसबारी क्लब काठमाडौँ सेमिफाइनल प्रवेश

प्रकाश न्यौपाने

फागुन ९ गते । नवौँ संस्करणको सूर्यनगर गोल्ड कप २०८१ को क्वार्टर फाइनल राउन्ड अन्तर्गत तेस्रो दिनको खेलमा बाँसबारी क्लब काठमाडौँ विजयी हुँदै सेमिफाइनलमा प्रवेश गरेको छ।

---

बर्दघाट–१६, सूर्यनगरस्थित खेल मैदानमा भएको प्रतिस्पर्धामा आयोजक नव युवा क्लब र बाँसबारी क्लब काठमाडौँ आमनेसामने भएका थिए। निर्धारित ९० मिनेटको खेल २-२ को बराबरीमा सकिएपछि खेलको नतिजा टाइब्रेकरमार्फत निर्धारण गरिएको थियो।

---

टाइब्रेकरमा बाँसबारी क्लब काठमाडौँले आयोजक नव युवा क्लबलाई ४-३ गोल अन्तरले पराजित गर्दै अन्तिम चारमा स्थान सुरक्षित गर्यो। आयोजक टोलीका लागि जर्सी नम्बर ११ महेश थापा क्षेत्री र जर्सी नम्बर १६ ले एक–एक गोल गरेका थिए। तर, दुर्भाग्यवश जर्सी नम्बर १२ कमल भट्टराईको आत्मघाती गोल आयोजकका लागि महँगो सावित भयो।

---

खेलको अन्त्यमा आयोजक टोलीका जर्सी नम्बर ११ महेश थापा क्षेत्री ‘म्यान अफ द म्याच’ घोषित भएका छन्। अब बाँसबारी क्लब काठमाडौँले सेमिफाइनलमा फागुन ११ गते एमएस्सी फुटबल क्लब भारत र चारतारे फुटबल क्लब मोरङबीचको विजेता टोलीसँग प्रतिस्पर्धा गर्नेछ।