नेकपाका गुल्मी जिल्ला इन्चार्ज, सेक्रेटरी सहित अभियान टोली गिरफ्तार, लुम्बिनी व्यूरोले दियो कडा चेतावनी 

शिव डुम्रे   माघ २३, लुम्बिनी  विप्लव नेतृत्वको नेपाल कम्युनिस्ट पार्टीले आफ्नो संगठन विस्तार तथा सुदृढीकरण अभियान संचालन गरिरँहदा बुधबार अर्घाखाँचीको छत्रदेव गाउपालिका ४ केरुङ्गाबाट अभियानकै क्रममा गुल्मी जिल्ला इन्चार्ज पूर्णबहादुर सिंह, सेक्रेटरी खिमबहादुर खड्का, अर्घाखाँची जिल्ला पार्टी सचिवालय सदस्य पिताम्बर पोखरेल र टुकलाल पुनलाई प्रहरीले गिरफ्तार गरेको छ ।  पार्टी अभियानको सिलसिलामा संगठन निर्माण तथा विस्तार गर्न पुगेका जिल्ला इन्चार्ज सहितको अभियान टोलीलाई प्रहरीले पक्राउ गरेको हो । देशभर संगठन निर्माणमा तिव्रता दिएको नेकपाले पछिल्लो समय अभियान चलाईरहेको थियो । विनाकारण आफ्ना नेता कार्यकर्ताहरुलाई गिरफ्तार गरेको भन्दै नेपाल कम्युनिष्ट पार्टी लुम्बिनी व्यूरोले एक विज्ञप्ती जारी गर्दै तत्काल नछोडे कडा संघर्षमा जाने चेतावनी दिएको छ । व्यूरो इन्चार्ज वीरजंगद्धारा हस्ताक्षरित विज्ञप्तीमा भनिएको छ, ‘गिरफ्तार गरिएका हाम्रो पार्टीका नेता तथा कार्यकर्तालाई तत्काल रिहा गरियोस् । रिहा नगरिए लुम्बिनी व्युरो बन्द सहितको कडा सङ्घर्षका कार्यक्रम घोषणा गर्न बाध्य हुनेछौं । यसबाट निस्कने परिणामको जिम्मेवारी सम्बन्धित पक्षले लिनुपर्ने यसै प्रेश विज्ञप्ती मार्फत जानकारी गराउँदछौं ।’ केही दिन अगाडीमात्रै सोही पार्टी्निकटको विद्यार्थी नेतालाई प्रहरीले गिरफ्तार गरेको थियो ।