गगनको आरोप : ओली संसद भन्दा पनि माथि बन्न खोजे

रसुवा । नेपाली कांग्रेसका नेता गगन थापाले केपी ओली नेतृत्वको सरकार संसदलाई आदेश दिदै आएको आरोप लगाएका छन् । रसुवामा नयाँ शक्ति पार्टीको जिल्ला कार्यसमिति सहित नेता कार्यकर्ताहरु नेपाली कांग्रेसमा प्रवेश गर्न आयोजित कार्यक्रममा बोल्दै थापाले सो बताएका हुन् ।

कांग्रेस केन्द्रीय सदस्य समेत रहेका थापाले सरकार संसदबाट कानुन बनाइ सरकारको बिरोध गर्नेहरुलाई नियन्त्रण गर्ने अभियानमा रहेको समेत बताए । थापाले यसैका लागि संसदबाट नयाँ नयाँ कानुन बनाउन हतार गरिएको बताए ।

उनले ओली सरकार ज्ञानेन्द्र शाहको सरकार भन्‍दा निरंकुश बन्दै गएको थापाले बताए । उनले भने, ‘प्रधानमन्त्री केपी ओलीलाई नै संघियता मन परेको छैन ।’ केपी ओलीकै कारण संघियता खतरामा परेको उनले बताए ।

नयाँ शक्तिको रसुवा शाखा नेपाली कांग्रेसमा बिलय भएको अवसरमा बोल्दै थापाले पार्टी प्रवेश ऐतिहासिक भएको बताए । कांग्रेस रसुवा र नयाँ शक्ति पार्टी रसुवाबीच एकता भएसँगै पार्टी बिलय भएको हो । सोमबार दिउँसो विशेष कार्यक्रम गरी पार्टी एकता भएको हो ।

कार्यक्रमका लागि काठमाडौंबाट कांग्रेस केन्द्रीय सभापति शेरबहादुर देउवा, वरिष्ठ नेता रामचन्द्र पौडेल, महामन्त्री डा शशांक कोइराला, सहमहामन्त्री डा प्रकाशशरण महत, प्रवक्ता विश्वप्रकाश शर्मा, केन्द्रीय सदस्य गगन थापा लगायतका नेताहरु पुगेका थिए