बुटवल – ईशनिन्दा गरेको आरोपमा सात वर्षसम्म कारावास सजाय भोगेकी पाकिस्तानी इसाइ महिला आसिया बीबीले देश छोडेकी छन् । आसियाका वकिल सैफ उल मलूकले बीबीसीलाई बताएअनुसार उनी क्यानडा पुगिसकेकी छन् ।
गत नोभेम्बर महिनामा उनीमाथिको मृत्युदण्डको सजाय सर्वोच्च अदालतले रद्द गरिदिएको थियो । तर जेलबाट रिहाइ भएपछि हिंसा मच्चिने आशंकामा उनलाई जासूसी संस्थाहरूले सुरक्षित स्थानमा राखेका थिए । सजाय रद्द गर्ने फैसला आएपछि हजारौं प्रदर्शनकारीहरूले हिंस्रक प्रदर्शन गरेका थिए ।
उनका दुई छोरीहरू पहिले नै देश छोडेर क्यानडा पुगेको र उनीहरूलाई शरण दिइएको बताइएको छ । सन् २००९ मा छिमेकीहरूसँग झगडा पर्दा उनीमाथि पैगम्बर मोहम्मदको अपमान गरेको आरोप लाग्यो र सन् २०१० मा जिल्ला अदालतले उनलाई मृत्युदण्ड दियो । सुरक्षाका लागि चिन्तित आसियाका पति आशिक मसीहले अघिल्लो हप्ता बेलायतसमक्ष आफ्नो परिवारलाई शरण दिन अपील गरेका थिए । पाकिस्तानको यस बहुचर्चित मुद्दामा आसिया बीबीले शुरूदेखि नै आफू निर्दोष रहेको बताउँदै आएकी छन् । पाकिस्तानमा ईशनिन्दा संवेदनशील विषयका रूपमा रहेको छ । यस कानूनको दुरुपयोग गरी प्रायः धार्मिक अल्पसंख्यकहरूलाई फसाउने गरिएको आलोचकहरूले बताएका छन् । बीबीसीबाट
थप समाचार
पोर्चुगलमा अन्र्तराष्ट्रिय साहित्य सम्मेलन हुँदै
