मिडिया काउन्सिल विधेयक फिर्ता लिन भैरहवाका पत्रकारको माग

७ जेष्ठ २०७६, मंगलवार ०   बिचार / प्रतिक्रिया
0 Shares


बुटवल -लुम्बिनी प्रेस क्लब सिद्धार्थनगर,रुपन्देहीले मिडिया काउन्सिल विधेयक फिर्ता गर्न माग गर्दै प्रतिनिधिसभाका सभामुख र राष्ट्रियसभाका अध्यक्षलाई ज्ञापनपत्र बुझाएको छ ।क्लबले जिल्ला प्रशासन कार्यालय रुपन्देहीका सहायक प्रमुख जिल्ला अधिकारी कल्पना घिमिरे नेपाल मार्फत ज्ञापनपत्र बुझाएको छ

ज्ञापनपत्र बुझाउदै क्लबका अध्यक्ष दिपेश पछाईले सरकारले हालै संघीय संसदमा दर्ता गरेको ‘नेपाल मिडिया काउन्सिल सम्बन्धि कानूनलाई संशोधन र एकीकरण गर्न बनेको विधेयक’ दर्ता गरेकोप्रति आपत्ति जनाए ।उनले समग्र प्रेस जगतलाई नियन्त्रण गर्ने र स्वतन्त्र रुपमा आलोचना गर्ने अधिकारबाट वञ्चित गर्ने उद्देश्यले ल्याइएको उक्त विधेयक प्रेस स्वतन्त्रता विरोधी रहेको बताए । विधेयकले संविधानले प्रदत्त अधिकारलाई कुण्ठित गरेको र स्वतन्त्र पत्रकारिता माथि अंकुश लगाउने काम गरेको पछाईले बताए ।

क्लबका निवर्तमान अध्यक्ष माधव ढुङ्गानाले श्रमजीवि पत्रकार ऐन र प्रेस काउन्सिल ऐन खारेज गर्ने गरी दर्ता गरिएको विधेयकमा अहिले रहेको प्रेस काउन्सिललाई थप प्रभावकारी बनाउने भन्दै नियन्त्रणकारी प्रावधान राखिनु लोकतान्त्रिक गणतन्त्रात्मक शासन व्यवस्थाको विरुद्धमा रहेको बताए ।क्लबको अगुवाईमा पत्रकारहरुले मंगलबार एक घण्टा जिल्ला प्रशासन कार्यालय परिसरमा धर्ना दिएका थिए ।

फेसबुकबाट तपाईको प्रतिक्रिया