काठमाडौं – सरकारका प्रवक्ता एवम् संचार तथा सूचना प्रविधिमन्त्री गोकुल बास्कोटाले हिंसा त्याग्ने संकल्प गरे नेत्रविक्रम चन्द (विप्लव) नेतृत्वको नेकपासँग वार्ता गर्ने बताएका छन् । विप्लव समूहले हिंसा जारी राखे त्यसलाई नियन्त्रण गर्ने दायित्वबाट सरकार पछि नहट्ने पनि मन्त्री बास्कोटाले बताए ।
सरकारले विप्लव समूहका हिंसात्मक गतिविधिमाथि प्रतिबन्ध लगाएकाले उक्त प्रतिबन्ध फिर्ता लिन नसकिने बास्कोटाको भनाइ छ ।
‘मुलुकको शान्ति सुरक्षा कायम गर्न र नागरिक सुरक्षाको प्रत्याभूति गराउने दायित्व भएकाले सरकारले त्यस्ता हिंसात्मक गतिविधिलाई कडाइका साथ नियन्त्रण गर्नुको विकल्प छैन,’ सोमबार संघीय संसद भवन परिसरमा सञ्चारकर्मीसँग कुरा गर्दै मन्त्री बास्कोटाले भने ।
संचारकर्मीले राखेका जिज्ञासाको जवाफ दिने क्रममा मन्त्री बास्कोटाले शान्तिपूर्ण राजनीतिमा आउनेलाई सरकारले सधैं सम्मान गर्ने पनि बताए । कुनै पनि राजनीतिक शक्तिलाई नियन्त्रणमा लिने सरकारको चाहना, उद्देश्य र लक्ष्य नभएको मन्त्री बास्कोटाको भनाइ थियो ।
