हङकङ– विवादास्पद सुपुर्दगी विधेयकको विरोधमा हङकङमा भएको प्रदर्शन हिंसात्मक बन्दै गएको छ । प्रदर्शनमा सहभागी दशौं हजार प्रदर्शनकारीले प्रहरीमाथि ढुङ्गामुढा र प्लाष्टिकका बोतल बर्षाएपछि जवाफमा प्रहरीले रबरको गोली र अश्रुग्यास प्रहार गरेको अन्तर्राष्ट्रिय सञ्चारमाध्यमले जनाएका छन् ।
शुरुमा शान्तिपूर्ण प्रदर्शन भइरहेका बेला एक्कासी प्रहरी र प्रदर्शनकारीबीच हिंसा मच्चिएको अन्तर्राष्ट्रिय सञ्चारमाध्यमले जनाएका छन् । छाता ओढेर प्रदर्शनमा उत्रेका प्रदर्शनकारीले छाताले प्रहरीमाथि आक्रमण गरेको र प्रहरीले बल प्रयोग गर्दा प्रदर्शनकारीतर्फ भागदौड मच्चिएको थियो । झडपमा दर्जनबढी प्रदर्शनकारी घाइते भएका छन् । प्रहरीले भने प्रदर्शनकारीमाथि प्लाष्टिकको गोली हानेको पुष्टि गर्दै स्थानीयलाई हिंसात्मक क्षेत्रबाट टाढै रहन आह्वान गरेको छ । प्रहरीले प्रदर्शनकारीलाई हिंसा रोक्न उर्दी जारी गर्दै अवस्थालाई शान्त बनाउन समेत आह्वान गरेको छ ।
प्रदर्शनका कारण हङकङको अवस्था अस्तव्यस्त बनेको छ भने व्यापारिक गतिविधि समेत प्रभावित भएको अन्तर्राष्ट्रिय सञ्चारमाध्यमले जनाएका छन् । नयाँ सुपुर्दगी कानूनले हङकङमा व्यक्तिगत अधिकारलाई कुण्ठित पार्ने र त्यहाँ चीन सरकारको प्रभाव बढ्ने भन्दै विपक्षीहरुले प्रदर्शन गरेका हुन् । प्रदर्शनकै कारण हङकङको व्यवस्थापिकामा उक्त विधेयकमाथिको बहस समेत स्थगित भएको छ ।
थप समाचार
