काठमाडौं – सत्तारुढ नेपाल कम्युनिष्ट पार्टी (नेकपा)का अध्यक्ष पुष्पकमल दाहाल प्रचण्डले आजै पार्टी एकताका धेरै काम सकिने बताएका छन् । मंगलबार ललितपुर जिल्ला कमिटीको पूर्णबैठकलाई सम्बोधन गर्दै नकेपा अध्यक्ष प्रचण्डले पार्टी एकताको बाँकी काम आषाढ मसान्तसम्म सक्ने यस अघि नै बताइए अनुसार नै काम भइरहेको र आज साँझ सम्म धेरै काम सकिने बताए । असार मसान्तसम्म पार्टी एकताका सबै काम सक्ने घोषणा पुरा गर्न पार्टीका अध्यक्ष केपी शर्मा ओली र आफूबीच छलफल भइरहेको भन्दै उनले भने, ‘मुलभूत रुपमा सबै हामीले टुंग्याउँछौं । अब खाली ठाउँ भर्न मात्र बाँकी छ ।’
केन्द्रीय सदस्यहरुको कार्य विभाजन, ज्येष्ठ कम्युनिष्ट मञ्च, सल्लाहकार कमिटी, विभाग, आयोग गठनबारे भएको सहमतिलाई छिट्टै सचिवालय, स्थायी कमिटी र केन्द्रीय कमिटीको बैठक बसेर अनुमोदन गर्ने उनले बताए । प्रचण्डले प्रतिक्रियावादीहरुले नेता नेताको झगडा गराएको दाबी गर्दै मिलाउने भूमिका खेल्न नेताहरुलाई आग्रह समेत गरेका छन् । उनले दुश्मनका कारण नभई आफ्नो कमजोरी, अहंकार र व्यक्तिवादी चिन्तनका कारण कम्युनिस्ट पार्टीहरु असफल भएको विश्व इतिहास रहेको भन्दै प्रचण्डले भने, ‘एकअर्कालाई निषेध गर्ने प्रवृत्ति नै हाम्रो काल हुने गरेको छ ।’
पार्टी एकता गर्ने घोषणासँगै प्रतिक्रियावादीहरुको चलखेल सुरु भएको भन्दै उनले अघि भने, ‘विभिन्न खालका प्रलोभन र धम्की, विभिन्न खालका घेराबन्दी नभएका होइनन् । त्यो सबैलाई पार गर्दै जनतासँग गरेको प्रतिवद्धता अनुसार नै हामीले एकता घोषणा गर्यौं ।’ उनले भने, मदन भण्डारी र जीवराज आश्रीतको अवसान भएकै दिन पार्टी एकता गरेर उँहाहरु प्रति विशेष सम्मान गर्यौ ।’
थप समाचार
एमाले ‘मिसन ८४’ मा छ : ओली
