सरकार सञ्चालनमा प्रधानमन्त्री ओली असफल : मिनेन्द्र रिजाल

प्रकाशित मिति:

काठमाडौं– प्रमुख प्रतिपक्षी दल नेपाली कांग्रेसका सांसद डाक्टर मिनेन्द्र रिजालले सरकार सञ्चालनको परीक्षामा प्रधानमन्त्री केपी ओली असफल भएको बताएका छन् । प्रतिनिधिसभाको आईतबारको बैठकको विशेष समयमा बोल्दै उनले सरकारले संसदसँग गरेको कार्यसम्पादन करार पूरा गर्न नसकेको बताएका हुन् । बजेट कार्यान्वयन सरकारले संसदसँग गरेको कार्यसम्पादन भएको भन्दै उनले त्यो पूरा हुन नसकेकाले प्रधानमन्त्री शासन सञ्चालनको परीक्षामा असफल भएको तर्क गरे ।

‘प्रधानमन्त्री ज्यू, तपाईंले मन्त्रीसँग गरेको कार्यसम्पादन करारका बारेमा त औँला उठाउनुहोला, मन्त्री फेर्नुहोला । तर जनताले प्रधानमन्त्रीसँग गरेको कार्यसम्पादन करार खै ? हिजो जनताले निर्वाचनमा गरेको कार्यसम्पादन करार पूरा भएन प्रधानमन्त्री ज्यू ।’ उनले भने, ‘त्यतिमात्रै होइन संसदले गरेको थियो । कार्यसम्पादन करार अघिल्लो बर्ष । बजेट कार्य सम्पादन करार हो । संसद र सरकारको । पूरा गर्न सक्नुभएन प्रधानमन्त्रीज्यू । यो परीक्षामा असफल भईसक्नुभयो । आउने दिन सफलता प्राप्त होस शुभकामना व्यक्त गर्छु ।’

तिथि मिति तोकेर पानीजहाज र रेल चढ्न सत्तापक्षले निम्ता गरेको स्मरण गराउँदै उनले अहिले भने आधार बर्ष भनेर आर्थिक वृद्धिको बारेमा हल्का टिप्पणी नगर्न प्रधानमन्त्रीलाई सचेत गराए । लोकतन्त्रका लागि सरकार नलडेको र प्रजातन्त्रका लागि लडेकाहरुले सरकार बनाएको दावी गर्दै उनले एक पल्टको लडाईले जीवनभरी जे पनि गर्न अनुमति नदिने बताए । सांसद रिजालले लोकतान्त्रिक आचरण देखाउन प्रधानमन्त्रीको ध्यानाकर्षण गराए । प्रधानमन्त्रीले आफ्नो सम्बोधनमा अर्को चुनाव नभएसम्म सरकार नफेरिने भन्दै सडकमा सरकार उल्टाउने सपना नदेख्न गरेको आग्रहका सम्बन्धमा टिप्पणी गर्दै सांसद रिजालले अर्को चुनावपछि नेपाली कांग्रेसको सरकार बन्ने दावी गरे ।

उनले भने, ‘प्रधानमन्त्रीले अर्को चुनाव नभएसम्म यही सरकार रहन्छ भन्नु भो । ठिक हो प्रधानमन्त्रीज्यू । यस्तो काम देखेपछि त अर्को पल्ट कांग्रेस बाहेक अरु कसको सरकार बन्छ ? यसपल्ट त यही सरकार भन्दा तरंग सत्तामा गयो गएन मलाई थाहा छैन । शुभकामना छ सत्ता भित्रै कोही तरंगित नभएको होस् ।’ सांसद रिजालले नियमावलीअनुसार प्रश्नोत्तरको समय उपलब्ध नगराईएकोमा व्यंग्यात्मक शैलीमा सभामुखको पनि ध्यानाकर्षण गराए । सांसद रिजालले भने, ‘प्रधानमन्त्रीको सम्बोधनको क्रममा प्रधानमन्त्रीलाई तन्दुरुस्त र स्वस्थ देखेर म यति खुसी भए कि प्रश्नोत्तरमा सोध्नै बिर्सेछु । अरु साथीहरुलाई पनि त्यही परेछ । सभामुखले नियमावली अनुसार प्रश्नोत्तरको समय त पक्कै दिनुभएको थियो । सभामुखले नियमावली मिच्नुहुन्न । मलाई विश्वास छ । म भिडियो रेकर्ड पनि चेक गर्दिन ।’