काठमाडौं – केही दिन यता राष्ट्रिय क्रिकेट टोलीका कप्तान पारस खड्कालाई सामाजिक सञ्जालमा अनफलो गरेको भन्दै राष्ट्रिय टोलीका अर्का सदस्य सन्दीप लामिछाने चर्चामा छन् । ट्वीटर र इन्स्टाग्राममा कप्तान खड्कालाई अनफलो गरेपछि सन्दीपमाथि नेपाली क्रिकेट प्रशंसक र फ्यानहरुले विभिन्न आरोप लगाउन थालेका छन् । सन्दीपमाथि फ्यानहरुले सन्दीपको ट्वीटरमा मेन्सन गरेर प्रश्न गरेका छन् ‘विदेशी लिग खेले र पैसा कमाए भन्दैमा मान्छे नै नचिन्ने ?’ सामाजिक सञ्जाल ट्वीटरमा मिलन सापकोटा (ओपोजेटिभ) ह्यान्डलबाट गरिएको प्रश्नमा सन्दीपले जवाफ दिएका छन् ।
मिलन सापकोटा ह्यान्डलबाट गरिएको एक ट्वीटमा सन्दीप सवाल जवाफमा उत्रिएका हुन् । ट्वीटमा मिलनले लेखेका छन् ‘भनेसी Sandeep Lamichhane ले पारस खड्का दाजुलाई Unfollow गरेछन् Twitter मा । विवाद के थियो थाहा भएन तर सन्दिपले जे गरे गलत गरे , पैसा कमाए होलान सन्दिपले तर पारस दाजुको level मा आउन वर्सौ लाग्छ ।नेपालीले नै hero बनाए सन्दिपलाई , zero नि बनाउन सक्छ्न ।’ उनको ट्वीवट लगत्तै यसबारेमा बहस भएको छ । अर्को एक जनालाई सापकोटाको ह्यान्डलबाट गएको जवाफमा सन्दीप पनि मिसिएका छन् ।सापकोटाले लेखेका छन्,‘त्यहिँ त सधै विवादमा आउँछ सन्दीप । पैसाले मातेको चाहिँ रैछ । मैले सुनेको कि सिपीएलबाट बोलाउँदा रिसाको रे ?’
त्यसको जवाफ सन्दीप लामिछानेले दिएका छन् । जवाफमा सन्दीप लेख्छन् ‘सुन्नेकुरा धेरै हुन्छ हजुर । कसको सुन्नुहून्छ तपाईले ? म नि हेरुमन कसले भनेको रहेछ कि सिपीएलबाट बोलाउँदा म रिसाए, सत्य कुरा नबुझीकन जे पनि भन्न सजिलो हुन्छ । कति सजिलै तपाईले मलाई जज गर्नु भयो है ? मन सफा हुनुपर्छ हजुर पैसा त आउने जाने कुरा हो ।’ नेपाली क्रिकेट टोली सिंगापुरमा हुने त्रिकोणात्मक श्रृंखलाका लागि बुधबार सिंगापुर प्रस्थान गरेको छ । सन्दीप भने सीपिएलबाट सिधैं सिंगापुर आएका हुन् । सन्दीपले सामाजिक सञ्जालबाट कप्तान पारस खड्कालाई अनफलो गरेसँगै दुई खेलाडी बीच बिवाद भएको भन्दै फ्यानहरु आक्रोशित बनेका छन् भने उनीहरुले सन्दीपको आलोचना गरिररहेका छन् ।
