अमेरिका – सवारी दुर्घटनामा परी अमेरिकामा एक हप्तामा ४ नेपालीको मृत्यु भएको छ । दुर्घटनामा चारजना घाइते भएका छन् । घाइते मध्ये एकको अवस्था गम्भिर रहेको बताइएको छ । अमेरिकाको ओहायोको स्थानीय सनबरी रोड र मोर्स रोडको बीच भागमा शनिवार राति १० बजे भएको दुर्घटनामा उनीहरूको मृत्यु भएको हो । २४ वर्षीय अञ्जु विश्वकर्मा र कुमारी विश्वकर्माको मृत्यु भएको छ । दुर्घटनामा २२ वर्षीया सिर्जना विश्वकर्माको अवस्था गम्भीर रहेको र उनको माउन्ट कार्मल अस्पतालमा उपचार भइरहेको स्थानीय समाचार संस्था डब्ल्युएमसएचले जनाएको छ । दुर्घटना तीन वटा गाडी एकआपसमा ठोक्किएर भएको थियो ।
यसअघि मंगलबार र बुधबार भएका दुई छुट्टाछुट्टै दुर्घटनामा परी महोत्तरीको बर्दिवासका विष्णुप्रसाद सापकोटा र कर्णबहादुर सुवेदीको मृत्यु भएको थियो । श्रीमतिसहित घुम्न निस्केका बेला बुधबार केन्टकीमा गाडीले ठक्कर दिँदा सापकोटाको मृत्यु भएको थियो । गाडीको ठक्करबाट गम्भीर घाइते भएका उनलाई युनिभर्सिटी अफ केन्टकी अस्पतालले मृत घोषित गरेको थियो ।
उनकी घाइते श्रीमति विमला सापकोटाको सोहि अस्पतालमा उपचार भइराखेको जनाइएको छ । उनको पनि अवस्था जटिल रहेको स्थानीय समाचार संस्था लेक्स १८ ले जनाएको छ। त्यस्तै पेन्सलभेनिया राज्यस्थित ल्यानकास्टरमा मङ्गलबार भएको दुर्घटनामा परी कर्णबहादुर सुवेदीको मृत्यु भएको छ । सडक पार गर्ने क्रममा उनलाई गाडीले ठक्कर दिएको थियो ।
थप समाचार
पोर्चुगलमा अन्र्तराष्ट्रिय साहित्य सम्मेलन हुँदै
