साइलेन्सरको तातोले पटाका पड्कँदा ४ घाइते

बुटवल –  रुपन्देहीमा गुडिरहेको मोटरसाइकलमा आफैले बोकेको पटाका अचानक पड्किँदा मोटरसाइकल चालकसहित ४ जना घाइते भएका छन् । तिहारका लागि भारतबाट नेपाल ल्याउँदै गरेको अवस्थामा मोटरसाइकलको साइलेन्सरको तातोले पटाका एक्कासी पड्किँदा ४ जना घाइते भएको प्रहरीले जनाएको छ । घाइते हुनेहरुमा लु.२० प. १५ नम्बरको मोटरसाइकल चालक रुपन्देहीको गैडहवा गाँउपालिका शिशवा बस्ने ३२ बर्षीय अशोक यादव, सोही स्थानका ठूलो पडरिया निवासी ७० बर्षीया गुलराही मुसलमान, २३ बर्षीय धमेन्द्र भुज र एकजना परिचय नखुलेकी पैदलयात्री महिला रहेको इलाका प्रहरी कार्यालयले लुम्बिनीका प्रहरी निरीक्षक ईश्वर कार्कीले जानकारी दिए ।

भारतीय बजार ककरहवाबाट लु.२०प. १५ नम्बरको मोटरसाइकलमा पटाका अवैधरुपमा नेपाल भित्र्याउँदै गरेको समयमा लुम्बिनी साँस्कृतिक नगरपालिका-३ को ठूलो पडरियामा सो घटना भएको उनले बताए । उनीहरुको साथबाट १ बोरा जुत्ता, चप्पल र आधा बोरा पटाका बरामद गरिएको उनले बताए । घाइतेहरु मध्ये चारजनाको मेडिकल कालेज भैरहवा र एक जनाको स्थानीय मेडिकलमा उपचार भइरहेको छ । -अनलाइनखबर