काठमाडौं – यात्रुसहितको बस सुनकोशीमा खसेर मृत्यु भएका व्यक्तिहरुका लागि स्थानीय सरकारले विदा दिएको छ । आइतबार दोलखाको मागा देउरालीबाट काठमाडौंतर्फ आइरहेको बा २ख ७२४५ नम्बरको बस चौतारा साँगाचोकगढी नगरपालिका–९ को सुकुटेनजिकै नदीमा खस्दा ६ बालबालिकासहित १८ जनाको मृत्यु भएको थियो भने ५१ जना घाइते भएका छन् ।
मृत्यु भएका १८ जनामध्ये दोलखा जिल्लाका १५ जना परेका छन्, जसमा शैलुङ गाउँपालिकाका मात्र १४ जनाको मृत्यु भएको छ । सिन्धुपाल्चोकको सुकुटे बस दुर्घटनामा परी मृत्यु हुनेको शोकमा आज शैलुङ गाउँपालिकाले सार्वजनिक विदा दिएको हो । गाउँपालिकाका अध्यक्ष भरतप्रसाद दुलालले शोक विज्ञप्ति प्रकाशित गरी शोकको घडीमा एक दिन गाउँपालिका भर सार्वजनिक विदा दिने बताउनु भएको छ ।दुलालद्धारा जारी विज्ञप्तिमा भनिएको छ, ‘यो शोकको घडीमा सिंगो शैलुङ गाउँपालिका शोकमा डुबेको छ। शोकलाई शक्तिमा बदल्न आग्रह गर्दै गाउँपालिका भित्रका सम्पूर्ण सरकारी कार्यालय शैक्षिक संस्था, गैरसरकारी संघ संस्थाका कार्यालयहरु बन्द रहनेछन् ।’
थप समाचार
रायमाझीसहित सात प्रतिवादीलाई थुनामै पठाउन आदेश
